भांगरभूंय | प्रतिनिधी
वेंचून आयल्यार पक्षांतर बंद करपाक धावें परिशिश्ट करतले घटमूटः कॉंग्रेस
पणजी, प्रतिनिधी : सत्तेर आयले उपरांत पक्षांतर आडोवपा खातीर संविधानच्या धाव्या परिशिश्टांक घटाय दितले. हाचे उपरांत जुलय म्हयन्या मेरेन देशांत भाजपाच्या १५ राज्यांनी सरकार कोसळटलें, असो दावो अखील भारतीय कॉंग्रेसी समितीचो फुडारी पवन खेरा हांणी केला.
संविधाना विशीं कॉंग्रेसीचे दक्षिणेचे उमेदवार विरीयातो फर्नांडीस हे स्पश्ट उलयल्यात. तें माथ्यार मारप, तें बदलप हो ताचो अर्थ न्हय. मात भाजपाक हें संविधान बदलपाक जाय देखून तांणी ‘४०० पार’ हें लक्ष्य लोकसभा वेचणुकेंत दवरलां, असो आरोप खेरा हांणी केलो.
खेरा हे बिरेस्तारा सकाळीं जाल्ले पत्रकार परिशदेंत उलयताले. तांचे वांगडा गोंय कॉंग्रेसीचे प्रदेशाध्यक्ष अमित पाटकार, अखील भारतीय कॉंग्रेस समितीचे मीडिया प्रभारी हर्षद शर्मा, उपाध्यक्ष सुनील कवठणकार आनी मिडिया मुखेली अमरनाथ पणजीकार हाजीर आशिल्ले.
लोकसभा वेंचणुकेचो दुसरो पांवडो जाले उपरांत प्रधानमंत्री नरेंद्र मोदी हे भियेल्यात. तांची भाशा बदलल्ल्या. आनीक फट मारपाक तांणी सुरूवात करून जे पेटपी मुद्दे आसात त्या मुद्यां पसून लोकांचें लक्ष वळोवपाचे ते यत्न करतात, असो आरोप खेरा हांणी केलो.
मोदी हांचे वेवसायीक इश्ट आसात, तांकां लागून गोंयचे ५० टक्के जमनींचें रुपांतरण करून गोंयचो सैम इबाडपाचें काम कांय जाणांनी सुरू केलां. गोंयाक कोळश्याचें हब करून राज्याचें रुपूच बदलपाचे तांचे यत्न चल्ल्यात. गोंय हें देशाच्या मुकुटांतलो एक हिरो. सत्तेर आयले उपरांत गोंयचें सैमीक संतुलन, जैवविविधताय आनी वळख राखून दवरपाचें काम आमी करतले, अशे खेरा हांणी सांगलें.
भाजपा परिवारांतलो खासदार प्रज्वल रेवण्णा हांणी संवसारांतलो सगळ्यांत व्हडलो लैंगीक छळ केला आनी प्रधानमंत्री मोदीन तांच्या खांदार हात दवरला. ह्या प्रकरणाची एसआयटी चवकशी सुरू जाले उपरांत प्रज्वलान जर्मनीक पळ काडलो. ताचे २९०० अश्लील व्हिडिओ आसात. प्रधानमंत्री मोदींक रेवण्णा हांची गुन्यांवाची म्हायती आसून लेगीत तांणी ताचो प्रचार केला, असो आरोप खेरा हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.