तरुण आनी (नि)रोगी

भांगरभूंय | प्रतिनिधी

सादे आनी ल्हान ल्हान बदल, आमकां शारिरीक आनी मानसीक नदरेन भलायकेन बरे करपाक शकतात. ते करप सहज शक्य आसा.

हालींसाराक हांवें आयकलां की जायते तरणाटे भलायकेच्या प्रस्नांची कागाळ करतात जाका लागून तांकां जिविताचो पुराय आनंद घेवप कठीण जाता. देखीक, म्हजी एक इश्टीण आनी वांगडी 20 वर्सां पिरायेची, नेमान धोंपरां दुखपाची कागाळ करता. वाडट्या वजनाचेरुय हुस्को उक्तायता…. आनी हे सगळे डायटिंगाचे सगळे यत्न आसून लेगीत. आनीक एक प्रसंग, एक 15 वर्सांचो भुरगो चडसो दुयेंत पडटा. तो म्हणटा, ताका जिविताचो वाज आयला आनी ताका समाधान दिवपी एकमेव गजाल म्हणल्यार ताचो मोबायल फोन, गेम्स आनी सोशल मिडिया.
कोवीड महामारीची हांगा भुमिका आसा हें मान्य. पूण हातूंत दोळ्यांक दिसता ते गजाली परस कितें तरी चड आसा. आमच्यो कुडी एक अद्भूत निर्मिती, एके तरेन अत्याधुनीक यंत्रां. अशें आसल्यार सगळ्या यंत्रां प्रमाण वापर केलो ना जाल्यार तांकां कळम येवं येता तशेंच योग्य तरेन हाताळणी केली ना जाल्यार लुकसाण जावंक शकता. जिणे पद्दत आनी शारिरीक आनी मानसीक भलायकी हांचे मदीं खर संबंद आसा.
पळोवया कांय जिवीत शैलींत बदल, जे एक दशक आदीं नाशिल्ले आनी आयज मुखेलपणान आसात:

1. कमी प्रमाणांत शारिरीक क्रिया – हीच चड स्पश्ट आनी सहजपणान दिसपी. येरादारीची सोय, लिफ्ट, बेकार रावप ही आयज एक सामान्य तरा आसा. भुरगीं लेगीत आतां शाळेंत पांयान वचनात आनी सकाळीं आनी दनपारां शाळां भायर व्हड प्रमाणांत येरादारीची कोंडी (ट्रॅफीक जाम) जाल्ल्यान हें स्पश्ट जाता. व्यायाम जालेंच पूण आमची कूड सामान्य तरेन हालचाली खातीर तयार केल्ली आसता. शारिरीक क्रिया वा हालचाल कुडीक जाय तशी काम करपाक आदार करता आनी शारिरीक आनी मानसीक भलायकेचेर सकारात्मक परिणाम करता.
2. ‘टेकअवे’ आनी ‘फूड डिलिव्हरी’ संस्कृतायेचो उदय – आमी अणभवूंक शकतात ती भूक दोन प्रकारची आसा, एक जैवीक भूक आनी दुसरी मानसीक भूक, जाका म्हाका ‘फूड स्वींग’ म्हणपाक आवडटा. हीं मूड स्विंगां सारकीं, पूण हांगा आमी खावपाक आवडपी दोन वा चड खाणाच्या वस्तूं मदीं झुलतात, फकत आमकां जाय म्हणून आनी भूक आशिल्ल्यान न्हय. आदीं भायर जेवप हो एक दुर्मीळ विशेशाधिकार आशिल्लो, ताका आदीं नियोजन आनी यत्न करचे पडटाले. आतां अन्न डिलिव्हरी अॅप्स आशिल्ल्यान, आयटमाचेर क्लीक करून ऑर्डर दिवप इतलें सोंपें आनी तें रोखडेंच तुमच्या दारांत पावता. चड खावप सोंपें जालां!
3. सोशल मिडिया ट्रॅप – सोशल मिडियान आमकां एक प्रतिमा-जागृत (Image conscious) समाज केला. तुमी कितेंय करूं, कोण तरी दुसरो सदांच बरो दिसता, चड मजा आनी चड यश मेळयता, अशें तांच्या चड फिल्टर केल्ल्या इन्स्टाग्राम आनी फेसबूक स्टेटसांतल्यान दिसता. हाका लागून आपल्या जिवितांत समाधान आनी खोशी जावप हें एक कठीण काम जालां. आमचो आत्मसम्मान आनी आमच्या जिवितांत सूख मेळोवपाची तांक उणी जाल्या. हाका लागून आत्मदया, ताण आनी चिंता निर्माण जाता, जाचो आमचे रोगप्रतिकार शक्तीचेर वायट परिणाम जाता.
4. झटपट संतुश्टीचें यूग – कितेंय नवें विकतें घेवपाचें नियोजन करतात? ऑनलायन वेबसायटी पळयात, ऑर्डर करात आनी थोड्याच वेळान घरा ती वस्त मेळयात. आमी झटपट संतुश्टीच्या युगांत रावतात. हाका लागून आमचे भितर हक्काची वृत्ती आयल्या आनी आमी उपकारी उणे जाल्यात. कृतज्ञतायेचो आमच्या एकंदर भलायकेचेर सकारात्मक परिणाम जाता अशें मानतात.
5. Night owl’s (जागरणां) – मोबायल फोन आमच्या न्हीद चक्राचो एक गुंतागुंतीचो भाग जाला. न्हीद ये मेरेन फोनाचेर आसप हें आमचे न्हीद पद्दतींत व्यत्यय हाडटा. मध्यान रात जाले उपरांत जागें रावप, आमच्या फोनांतल्यान स्क्रोल करप ही एक सामान्य पद्दत. हाचो परिणाम आमचे न्हिदेच्या प्रमाणाचेर आनी दर्ज्याचेर जाला. दिसांतल्यान लेगीत सतत फोन तपासपाची आमकां संवय जाल्या. स्क्रीन टायम चड आसल्यार भलायकेचेर वायट परिणाम जाता अशें समजतात. न्हीद आनी भलायकी हांचे मदलो संबंद संशोधनांतल्यान स्पश्ट जाला तशेंच न्हीद आनी आमची रोगप्रतिकार शक्त हांचे मदलो संबंद. न्हीद नाशिल्ल्यान आमी आमचे दिसपट्टे जिणेंत खूब प्रतिक्रियाशील जाल्यात.
   आमची भलायकी सुदारपाक आनी परतून तरणेपण आनी भलायकेन भरिल्ले स्थितींत पावपाक आमी जायत्यो गजाली करूंक शकतात. कायझेनाच्या नेमांक पाळो दिवप म्हणजेच ल्हान ल्हान बदल हाडप हें एकठांय केल्यार व्हड बदल घडोवन हाडप शक्य आसा. वयर दिल्ल्या दरेका पांच गजालीं कडेन पळोवया, आनी कितें बदल केल्यार ते उपकाराक पडूं येता ते समजुया.
6. आमी बसतात त्या दर एका वराक आमच्या कामाचे सुवातेर 5-10 मिणटां चलूंक दिवया. वा आमच्या भुरग्यांक शाळेचे गेटी कडल्यान मातशें पयस सोडया. अशे तरेन आमी तांकां फकत चलपाक लावचे नात, पूण येरादारीच्या संकश्टांचेंय वेवस्थापन करपाक तांकां शिकयतले.
7. ‘ऑर्डर केल्ल्या जेवणा खातीर’ नोंद पुस्तिका दवरची, जाका लागून आमी कितले फावट भायर वा ऑर्डर केल्लें जेवण खातात हाची जाणविकाय जावंक शकता आनी तें उणें करपाक शकतात. म्हयन्यांत आमी कितले फावट भायल्यान जेवण ऑर्डर करूंक शकतात वा भायर जेवपाक शकतात हाची मर्यादा दवरात.
8. तुमच्या सगळ्या सोशल मिडिया अॅप्लिकेशनांक टायमर दवरात, सेटिंग्ज वरवीं खंयच्याय फोनाचेर सहजपणान ते करूं येता. अशे तरेन तुमी हेरां कडेन स्वताची तुळा करपाक लागपी वेळ उणो करूंक शकतात तशेंच तुमचो मिनी डिजिटल डिटॉक्स दर दिसा करपाक शकतात आनी जिणेचो चड आनंद घेवंक शकतात.
9. तुमकां खंयचीय वस्तू जाय जाल्यार ती विकत घेवपाक कळाव करपाक शिकात, सुरवात करतना फकत एक दीस. जो मेरेन ती वस्त खरीच गरजेची आसा तो मेरेन. कळाव करून तुमी संयमाची कला शिकपाक लागतले.
10. फोन दुसरे कुडींत दवरून न्हिदपाचो सराव करात. तुमच्या अलार्माची काळजी? आमचे कडेन आदीं गजर घडयाळी आशिल्ल्यो. तांची याद आसा? तांचो वापर करया.
    हे सादे आनी ल्हान ल्हान बदल, आमकां शारिरीक आनी मानसीक नदरेन भलायकेन बरे करपाक शकतात. ते करप सहज शक्य आसा, आमचे भलायके खातीर ते करुया.

रिफा रॉड्रिगीश
7507799980