भांगरभूंय | प्रतिनिधी
भारतीय क्रिकेट नियामक मंडळान (बीसीसीआय) 2023-24ची वर्सुकी कबलातीची वळेरी जाहीर केली. युवा विकेटकीपर बॅट्समन इशान किशन आनी श्रेयस अय्यर हांकां कबलातीतल्यान वगळायल्यात. ह्या दोगांनी हालींच देशांतर्गत रणजी करंड क्रिकेट सोडून इंडियन प्रिमियर लिगेची तयारी करपाक लागिल्ले.
ह्या दोन युवा खेळगड्यां खेरीत सध्या पंगडांतल्यान भायर आशिल्ल्या अजिंक्य रहाणे, युजवेंद्र चहल, शिखर धवन आनी चेतेश्वर पुजारा हांकां लेगीत केंद्रीय कबलातींत सुवात दिवंक ना.
बीसीसीआयन जाहीर केल्ले नवे कबलाती प्रमाण मुखेली रोहीत शर्मा, अणभवी विराट कोहली, रवींद्र जडेजा आनी जसप्रीत बुमरा हांची ए+ ग्रेड कायम दवरल्या. ह्या सगल्यांक दरेकी सात कोटी रुपया मेळटले.
तांचे खेरीत मोहम्मद सिराज, लोकेश राहुल आनी शुभमन गिल हांकां ग्रेड ए दिवन बडती दिल्या. जाल्यार ऋषभ पंत आनी अक्षर पटेल हांकां ग्रेड ए तल्यान डिमोट करून ग्रेड बी हातूंत घाल्यात. इतकेंच न्हय यशस्वी जयस्वालाक ग्रेड बी दिल्या. ही कबलात 1 ऑक्टोबर 2023 सावन 30 सप्टेंबर 2024 मेरेन चलतली.
बीसीसीआयन केंद्रीय कबलातींत 30 खेळगड्यांचो आस्पाव केला. ग्रेड ए+ हातूंत चार खेळगडे, ग्रेड ए हातंत स, ग्रेड बी हातूंत पांच आनी ग्रेड सी हातूंत 15 खेळगड्यांचो आस्पाव केला. पोरूं मंडळान 26 खेळगड्यांचो केंद्रीय कबलातींत आस्पाव केल्लो.
ग्रेड ए+ हातूंत रोहीत शर्मा, विराट कोहली, जसप्रीत बुमरा आनी रवींद्र जडेजा, ग्रेड ए हातूंत आर आस्विन, मोहम्मद शमी, मोहम्मद सिराज, लोकेश राहुल, शुभमन गिल आनी हार्दिक पांड्या, ग्रेड बी हातूंत सुर्यकुमार यादव, ऋषभ पंत, कुलदीप यादव, अक्षर पटेल, यशस्वी जयस्वाल, ग्रेड सी हातूंत रिंकू सिंग, तिलक वर्मा, ऋतुराज गायकवाड, शार्दुल ठाकूर, शिवम दुबे, रवी बिश्नोई, जितेश शर्मा, वॉशिंग्टन सुंदर, मुकेश कुमार, संजू सॅमसन, अर्शदीप सिंग, के एस भरत, प्रसिद्ध कृष्णा, आवेश खान आनी रजत पाटीदार.
हालींच टॅस्टींत पदार्पण करपी ध्रुव जुरेल आनी सरफराज खान हांकां लेगीत केंद्रीय कबलातींत सुवात मेळपाक शकता. जुरेल आनी सरफराज हांणी अजून मेरेन दोन टॅस्टीच खेळ्ळ्यात. पूण, धर्मशालांत इंग्लंडा आडचे पांचवे टॅस्टींत तांकां खेळपाक मेळटा जाल्यार तांचो आस्पाव ग्रेड सी हातूंत करपाक शकता अशें बीसीसीआयन म्हणलां.
बीसीसीआयच्या नेमा प्रमाण केंद्रीय कबलातींत आस्पाव करून घेवपा खातीर खेळगड्यान किमान तीन टॅस्टी वा आठ वन डे वा 10 टी-20 मॅची खेळपाक जाय.
निवड समितीन आकाश दीप, विजय कुमार, उमरान मलिक, यश दयाल आनी विद्वत कावरेप्पा हांचो फास्ट बॉलींग कबलातींत आस्पाव केला. ते केंद्रीय कबलातीचे वांगडी नात. हो अतिरिक्त कबलात आसा.
अय्यर-इशानाचेर बीसीसीआय बेजार
श्रेयस अय्यर आनी इशान किशन हांचो लेगीत विचार केल्लो. जे खेळगडे राष्ट्रीय पंगडांतल्यान भायर आसात, तांणी देशांतर्गत क्रिकेट खेळपाक म्हत्व दिवपाक जाय. पूण, ह्या दोगांयनी रणजी क्रिकेट खेळपा बदल इंडियन प्रिमियर लिगेची करपाक चड म्हत्व दिल्लें ताका लागून आमी तांचो केंद्रीय कबलाती खातीर विचार करूंक ना अशें बीसीसीआयन म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
