भांगरभूंय | प्रतिनिधी
फोंडें : ढवळी फोंडें हांगां बुधवारा सकाळीं साडे धा वरांचेर रस्त्या कुशीक आशिल्ल्या, ट्रान्सफॉर्मराची दुरुस्ती करतना विजेचो धपको बसून उपेंद्र नायक (38, आपेव्हाळ प्रियोळ) हो कर्मचारी जखमी जालो. जखमी जाल्ले अवस्थेंत ताका मडगांवच्या दक्षीण गोंय जिल्हो हॉस्पिटलांत उपचार सुरू केलें. आतां ताची भलायकी मातशीं सुदारल्या.
मेळिल्ले म्हायती प्रमाण एका इमारती लागसार आशिल्ल्या ट्रान्सफॉर्मराची दुरुस्ती करपा खातीर उपेंद्र नायक लायटीच्या खांब्यार चडिल्लो. त्या वेळार ट्रान्सफॉर्मराचें दोन फ्यूज काडिल्ले. जाल्यार एक फ्यूज काडूंक नाशिल्लो. ताका लागून विजेचो धपको बसून उपेंद्र नायक सकयल पडलो. पूण त्या वेळार ट्रान्सफॉर्मरा भोंवतणी लायिल्या जाळ्याच्या कुंपणांत उपेंद्र नायक कोसळ्ळो. रोखडीच 108 एम्बुलन्हस आपोवन ताका उपचारा खातीर फोंडेंच्या उपजिल्हो हॉस्पिटलांत व्हेलो. उपरांत जखम जड जाल्ल्यान ताका दक्षीण गोंय जिल्हो हॉस्पिटलांत धाडलो. ताच्या हाताक जखम जाल्ली. उपचार करून बुधवार सांज मेरेन स्थिती बरीं आसा अशीं म्हयती मेळ्ळ्या. फोंडें पुलिसांनी घडणुकेचो पंचनामो केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.