भांगरभूंय | प्रतिनिधी
536 मदल्या 560 प्रकरणांचो तपास; मुख्यमंत्र्याची लेखी जाप
पणजी: ड्रग्स तस्करी कडेन संबंदीत 186 गोंयकारांक फाटल्या चार वर्सांत पुलिसांनी अटक केल्या. जाल्यार ह्या चार वर्सांत गोंयांत ड्रग्स तस्करीची 563 प्रकरणां उक्तडार आयल्यांत. तातूंतल्या 560 प्रकरणांचो तपास लावपाक पुलिसांक येस आयलां.
आमदार दिगंबर कामत हांणी विधानसभा अधिवेशनांत विचारिल्ल्या लेखी प्रस्नाचे जापेंतल्यान डॉ. प्रमोद सावंत हांणी ही म्हायती दिली. 2020 ते 2023 ह्या काळांत राज्यांत ड्रग्स तस्करी विशीं कितलीं प्रकरणां घडलीं, तातूंतल्या कितल्या प्रकरणांचो तपास लावपाक पुलिसांक येस आयलें, ह्या प्रकरणांत अटक केल्ल्या विदेशी, बिगर गोंयकार आनी गोंयकार नागरीक कितले आसात हाची आंकडेवारी मागिल्ली.
ते प्रमाण मुख्यमंत्र्यांनी सादर केल्ले आंकवाडेवारींतल्यान 2022 चे तुळेन 2023 वर्सा अशा प्रकरणांत उणाव जाल्ल्याचें दिसून येता. 2020 वर्सा ड्रग्स तस्करी प्रकरणांत विदेशी, गोंया भायले आनी गोंयकार अशे मेळून 172 जाणांक अटक केल्ली. 2021 वर्सा 138, 2022 वर्सा 188 आनी 2023 वर्सा 166 जाणांक अटक केल्ल्याचें आंकडेवारींतल्यान दिसून येता.
मजगतीं, गोंयांत ड्रग्स तस्करीचे प्रकार वाडल्यात. तातूंत गोंयच्या थळाव्यांचेंय प्रमाण वाडत चल्लां. हाका लागून हुस्क्याची परिस्थिती निर्माण जाल्या. 2020 वर्सा अशा प्रकरणांनी 54 गोंयकारांक अटक जाल्ली. 2021 वर्सा ही संख्या फक्त 29 आशिल्ली. पूण 2022 वर्सा ती वाडून 56 जाली. फाटल्या वर्सा 47 थळाव्यांक पुलिसांनी अशा प्रकरणांनी अटक केल्ली.
ड्रग्स प्रकरणां आनी कारवाय
वर्स प्रकरणाचो तपास विदेशी गोंया भायले गोंयकार
2020 148 147 36 82 54
2021 121 121 22 87 29
2022 154 152 29 103 56
2023 140 140 21 98 47
वट्ट 563 560 108 370 186
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
