भांगरभूंय | प्रतिनिधी
भांगरभूंय । प्रतिनिधी
पोरणे गोंयः गोंयांतल्या शिमग्याक सुरवात करून दिवपी डोंगरी-मंडूर हांगच्या इत्रूजाक व्हडा दबाज्यान सुरवात जाली. ह्या उत्सवाक राज्य उत्सवाचो दर्जो दिवपाची मागणी मंडुरचो सरपंच प्रशांत नायक हाणी केल्या. केंद्रीय पर्यटन राज्यमंत्री श्रीपाद नायक, सान्तआंद्रेंचो आमदार विरेश बोरकार,हळदोणचो आमदार अॅड कार्लुस फेरेरा आनी आरजीपीचो अध्यक्ष मनोज परब हांणी हे मागणेक पुराय तेंको दिला.
इत्रूजान आमची परंपरा आनी सांस्कृतीक दायज राखून दवोरल्या. डोंगरेचो हांव नातू हाचो म्हाका अभिमान आसा. इत्रूजाक राज्य उत्सवाचो दर्जो फावो आसा अशें श्रीपाद नायक हांणी सांगलें. इत्रूजाक राज्य उत्सवाचो दर्जो दिवपा संबंदी आपणे मुख्यमंत्री डॉ प्रमोद सावंत हांचे कडेन उलोवणी केल्यांत अशी म्हायती तांणी दिली. इत्रूज व्हो डोंगरीचो एक आगळो- वेगळो असो उत्सव आसा. फुडले पिळगे खातीर ताच्या संवर्धना खातीर ताका राज्य उत्सवाचो दर्जो दिल्यार बरें जातलें अशें आमदार विरेश बोरकार हांणी सांगलें.
हळदोण्याचो आमदार अॅड कार्लुस फेरेरा हांणी लोककला आनी परंपरा तिगोवन दवोरपी इत्रूज सारक्या उत्सवांत राज्य उत्सवाचो दर्जो दिवपाक जाय ताचे वरवीं आमची संस्कृती आनी परंपरेक संवसारीक पांवड्यार मान्यताय मेळपाक शकतली अशे सांगलें. इत्रूजाक राज्य उत्सवाचो दर्जो मेळचो हे खातीर आमी वावुरतले. इत्रूजाचो राज्य उत्सवांत आसवाप करपाचो विशय आमच्या लोकसभा वेंचणुकेच्या जाहिरनाम्यांत आसतोलो, अशें आरजीपीचो अध्यक्ष मनोज परब हांणी सांगलें.
डोंगरीच्या व्हडलें भाट आनी धाकलें भाट मजगतीं धोल, ताशे, सुवारी आनी हेर वाद्यांच्या आवाजांत काडिल्ले इत्रूज मिरवणुकेंत श्रीपाद नायक आनी विरेश बोरकार हाणी धोल वाजयले. मिरवणुकीं तांचे सयत, कार्लुस फेरेरा, आदलो आमदार फ्रान्सिस सिल्वेरा, जिल्हो पंचायत वांगडी धाकू मडकयकार, मनोज परब, सरपंच प्रशांत नायक हांणी वांटो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
