भांगरभूंय | प्रतिनिधी
पणजी : गोंयची नामनेची भाशातज्ञ, विद्यार्थी प्रिय प्राध्यापक आनी साहित्य अकादेमी पुरस्कार फावो जाल्ली लेखिका डॉ. माधवी सरदेसाय हांच्या उगडासान परिक्रमा नॉलेज टर्मिनसचे वतीन दर वर्सा दिवपी युवा शिक्षक पुरस्कारा खातीर अर्ज मागयल्यात. पंचवीस हजार रुपया रोख, मानपत्र, यादस्तीक अशें ह्या पुरस्काराचें स्वरूप आसा. ह्या पुरस्कारा खातीरच्या अर्जदाराची पिराय ४० वर्सां मेरेन आसपाक जाय. मात गरज पडल्यार निवड समितीक हातूंत बदल करपाची मेकळीक आसतली.
अर्जदार खंयच्याय विशयाचो शिक्षक आसपाक शकता. ते प्रमाण नेमान शिकोवपी शिक्षकां वांगडा वरां प्रमाण शिकोवपी, कंत्राट पद्धतीचेर शिकोवपी शिक्षकूय ह्या पुरस्कारा खातीर आपलो अर्ज धाडपाक शकतात. ह्या शिक्षकाची विद्यार्थी चळवळ, तशेंच परिक्रमा नॉलेज टर्मिनसांतल्या योगदानाची ह्या वेळार विशेश दखल घेतले. १५ जानेवारो २०२५ मेरेनहे अर्ज बरोवन धाडून दिवपाचो उलो ह्या वेळार मारला.
परिक्रमा ०.७ च्या ’झिरो फेस्त’च्या उक्तावण सुवाळ्यांत, म्हळ्यार १ फेब्रुवारी २०२५ दिसा हो पुरस्कार मानेस्तां हस्तुकीं भेटयतले. चड म्हायती खातीर निखिल साळगांवकार (८८०५५०६६०७) हांचे कडेन संपर्क करचो, अशें कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
