डॉ. फ्रान्सीस लुईस गोम्स हांचें घर कोसळपाचे वाटेर
भांगरभूंय | प्रतिनिधी
मडगांव, प्रतिनिधी : कोलमोरोड वाठारांतल्या डॉ. फ्रान्सीस लुईस गोम्स रावताले तें घर आतां कोसळपाचे वाटेर आसा. ह्या घराक दायज आशिल्ल्यान तें सांबाळपाची मागणी कॉंग्रेसीन केल्या. तशेंच घराची दुरुस्ती करपाचे निर्देश जिल्हो प्रशासनाक दिल्यात. ही सुवात खाजगी मालकेची आशिल्ल्यान तातूंतय वाद आसा. ताका लागून घर संवर्धनांत कायदेशीर आडखळी आशिल्ल्याचें आमदार दिगंबर कामत हांणी पळोवणी करतना स्पश्ट केलें.
डॉ. गोम्स रावताले तें घर मोडपाक पावलां. ह्या घराचो एक भाग कोसळपाक पावला. घराचे दुसरे वटेन एक कुटूंब रावता. तांचे सुरक्षिततायेचो प्रस्न निर्माण जाला. कॉंग्रेसीचे फुडारी साविओ डिसिल्वा आनी साविओ कुतिन्हो हांणी पळोवणी केले उपरांत सांगलें, डॉ. गोम्स हांचें ७५० चौ. मि. घर संपादन करून तें संरक्षीत करपाची मागणी २००९ सावन करता. २०१२ त सरकार बदल्ले उपरांतूय ही दायज वास्तू संरक्षीत करपाची मागणी केल्ली. ही सुवात मडगांव मतदारसंघांत येता. डॉ. गोम्स हांचें घर खाजगी जाग्यार येता. फाटल्या वर्सा एक वणत पडली तेन्ना जिल्हाधिकारी, आमदार सगळे आयिल्ले. मात आजूनय कांय जावंक ना. डॉ. गोम्स हांचें घरूय दायज स्थळ आशिल्ल्यान तें सांबाळपाची गरज आसा, अशी मागणी साविओ कुतिन्हो आनी साविओ डिसिल्वा हांणी केली. तशेंच ह्या घरांत रावपी कुटुंबीयां सयत शेजराच्या घरांकूय धोको निर्माण जाला. हाचेर बेगोबेग उपाय करपाची गरज आशिल्ल्याचें सांगलें.
मजगतीं, मडगांवचे आमदार दिगंबर कामत हांणीय डॉ. गोम्स हांच्या घराची पळोवणी केली. थंय रावपी कुटुंबीयां कडेन चर्चा केली. तशेंच तें घर जे खाजगी जमनीर आसा तांतल्या एका जमीन धनया कडेन चर्चा केली.
कामत हांणी सांगलें, डॉ. गोम्स रावपी जमीन खाजगी मालकेची आसा. थंय एक कुटूंब फाटल्या कितल्याशाच वर्सां सावन रावता. सध्या घराचे एके वटेनची वणत कोसळिल्ल्यान ह्या जाग्या विशीं खटो चालू आसा. मामलेदारां कडेन उलोवप केलां. मामलेदारांच्या आदेशा उपरांत घराची दुरुस्ती करतले अशें तांणी सांगलें.
गोंयचे पूत
डाॅ. फ्रान्सीस लुईस गोम्स हांचो काळ १८२९ ते १८६९. पिरायेच्या ४० व्या वर्सा तांकां मरण आयलें. ते दोतोर, सर्जन, लेखक, इतिहासकार, अर्थतज्ञ आशिल्ले. १८६१ ते १८६९ मेरेन ते पुर्तुगेज संसदेंत गोंयचे प्रतिनिधी आशिल्ले. कोंकणी, मराठी, इंग्लीश, पुर्तुगेज, स्पेनिश, इटालियन, फ्रेंच आनी लॅटिन ह्या भाशांचेर तांचो शेक आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
