डॉमनीक नोरोन्हांची अपात्रताय याचिका भायरायली

भांगरभूंय | प्रतिनिधी

आमदार अपात्रताय प्रकरण

पणजी : घटनेच्या धाव्या परिशिश्टांतल्या कलम 4 (2) प्रमाण पक्षाच्या दोन तृतियांश आमदारांनी स्वतंत्र गट स्थापन करून तो दुसऱ्या पक्षांत विलीन केलो जाल्यार आमदार अपात्र थारनात. मूळ पक्षांत स्वतंत्र गट स्थापन जावप वा एक गट दुसऱ्या पक्षांत विलीन जाता अशा आशयाच्या थारावाची आवश्यकता ना, अशें स्पश्ट करीत सभापती रमेश तवडकार हांणी डॉमनीक नोरोन्हा हांची अपात्रताय याचिका भायरायली. सभापतींनी 35 पानांच्या निवाड्यांत अपात्रताय याचिके विशीं उच्च न्यायालय तशेंच सर्वोच्च न्यायालयाच्या निवाड्यांचो संदर्भ दिला. विधीमंडळ पंगड विलीन जावपा खातीर राजकी पक्ष विलीन जावपाची गरज ना.

ह्या निवाड्याचो हांव अभ्यास करतलों. जाणकारां कडेन चर्चा केले उपरांत फुडली कृती थारायतलों अशें याचिकादार डॉमनीक नोरोन्हा हांणी निवाड्या उपरांत सांगलें. दोन वर्सां पयलीं सप्टेंबर 2022 वर्सा काँग्रेसीच्या 8 आमदारांनी भाजपांत प्रवेश केल्लो. आमदार मायकल लोबो, डिलायला लोबो, केदार नायक, रुडॉल्फ फर्नांडीस, संकल्प आमोणकार, दिगंबर कामत, राजेश फळदेसाय आनी अालेक्स सिक्वेरा ह्या आमदारांनी काँग्रेसीत वेगळो गट स्थापन करून भाजपांत प्रवेश केल्लो. तांचो भाजप प्रवेश बेकायदाे थारता आनी ते अपात्र थारतात, असो दावो करीत डॉमनीक नोरोन्हा हांणी 8 आमदारां आड अपात्रताय याचिका दाखल केल्ली. ह्या अपात्रताय याचिकेचेर सुनावणी जावन सभापती रमेश तवडकार हांणी सोमारा निवाडो दिलो. घटनेच्या धाव्या परिशिश्टा प्रमाण आमदारांच्या गटाचे विलिनीकरण बेकायदाे थारना अशें सभापती रमेश तवडकार हांणी निवाड्यांत स्पश्ट केलां.

आमदार अपात्रताये संबंदी घटनेच्या धाव्या परिशिश्टाच्या कलम 4 (2) प्रमाण पक्षा कडेन फारकत घेवन दोन तृतियांश आमदार वेगळो गट स्थापन करूंक शकतात. हे खातीर पक्षांत वेगळो गट स्थापन जावप वा थारावाची आवश्यकता नासता, अशें खंडपिठान स्पश्ट केलां. सभापतींनी निवाड्यांत हो संदर्भ दिला.

सुभाष देसाय आड प्रधान सचीव, महाराष्ट्र राज्यपाल हांचे मजगतीं दिल्ल्या निवाड्याचो संदर्भ सभापतींनी निवाड्यांत दिला. पक्षाच्या दोन तृतियांश आमदारांनी वेगळो गट स्थापन करून तो दुसऱ्या पक्षांत विलीन केलो जाल्यार ते अपात्र थारनात, अशें सर्वोच्च न्यायालयान एका निवाड्यांत स्पश्ट केलां.

विधीमंडळ गट दुसऱ्या पक्षांत विलीन जावपा खातीर मूळ पक्षांत थाराव संमत जावपा सयत पक्षांत फूट पडपाची गरज आसा. नाजाल्यार दुसऱ्या पक्षांत गेल्ले आमदार अपात्र थारतात असो दावो याचिकादारान केल्लो.

दोन तृतियांश आमदारांनी वेगळो गट स्थापन करून तो दुसऱ्या पक्षांत विलीन केल्यार धाव्या परिशिश्टा प्रमाण आमदार अपात्र थारनात, असो दावो प्रतिवादी आमदारांच्या आदवोगादांनी केल्लो.

सभापतींनी रंग दाखोवपाक सुरवात केली : अमीत पाटकार

अपात्रताय याचिका भायरावन सभापती रमेश तवडकार हांणी आपले रंग दाखोवपाक सुरवात केल्या. काँग्रेस पक्षाची अपात्रताय याचिका सभापतीं मुखार बरोच तेप प्रलंबीत आसा. संदीसादूंक पक्षांतर करपाचे धाडस जावचे ना अशी कायदेशीर तजवीज करपाचो यत्न हांव करतलों. म्हजे याचिकेचेर सभापती बेगीन निवाडो दितले, अशी आस्त हांव बाळगिता, अशें प्रदेश काँग्रेस अध्यक्ष अमीत पाटकार हांणी म्हणलें