भांगरभूंय | प्रतिनिधी
वास्को, प्रतिनिधी: डेटिंग ऍप वापरून ओरोशी-कांसावलेच्या डेलेनो बॉस्को फर्नांडीस ह्या तारवट्याचे सुमार एक कोटी पस्तीस लाख रुपया लुटिल्ल्या प्रकरणांत वेर्णा पुलिसांनी दोन बायलां सयत तीन दुबावितां आड गुन्यांव दाखल केला. ह्या दुबावितांची वळख पटल्या. तीं सगळीं अंगडी-मुकेरी, कर्नाटक हांगचीं. मजगतीं, ह्या प्रकरणांतले तेंच आरोपी आसात काय तांच्या नांवांचो हेरांनी वापर केला, हे विशीं तपास चालू आसा अशें वास्कोचे उपअधीक्षक संतोष देसाय हांणी सांगलें.
डेलेनो फर्नांडीस हो तारवटी आशिल्ल्यान दर स म्हयन्यांत तो गोंयांत येता. फर्नांडीस हाका २०२२ते २०२३ ह्या काळांत ब्लॅकमेल करपाचो प्रकार घडिल्लो. कर्नाटकांतली झीटा फर्नांडीस आनी हेरांनी पयलीं चॅट करून ह्या डेटिंग ऍपाच्या आधारान डेलेना हाचे कडेन संपर्क केलो. ह्या ऍपा वरवीं तांचे चॅट चालू असतनाच एकदां झीटा फर्नांडीस हिणें व्हिडिओ कॉल केलो. उपरांत व्हिडिओ कॉलाचो गैरवापर करूत झीटा फर्नांडीस आनी हेरांनी डेलेनो हाका आपल्या जाळ्यांत ओडलो. उपरांत तो व्हिडिओ वापरून ताञणी ताका ब्लॅकमे करपाक सुरू केलें. तांणी मागिल्ले पयशे दिवंक ना जाल्यार काडिल्लो व्हिडिओ ऑनलाईन अपलोड करपाची धमकी डेलेनो हाका मेळपाक लागली. ताका लागून भियेल्ल्या डेलेनो हांणी तांचे मागणे प्रमाण पयशे दिवपाक सुरवात केली. त्या तिगांयनी दिल्ल्या विवीध बँक खात्यांनी तो पयशे धाडटालो. तो तांच्यो मागण्यो पुराय केल्ल्यान त्या तिगांयनी ताका एक कोटी पस्तीस लाख रुपयांनी लुटले. निमाणें डेलेनो हांणी वेर्णा पुलीस स्टेशनांत हे विशीं कागाळ केली.
हे कागाळीची दखल घेवन वेर्णा पुलीस स्टेशनाचे निरीक्षक नेल्सन कुलासो हांणी तपास करपाक सुरवात केली. तेन्ना झीटा फर्नांडीस, मेरी फर्नांडीस, शंकर जाधव (सगळी कर्नाटका रावपी) हांची वळख पटली. तांचे आड भादंस ४२० आनी ३८४ कलमां खाला गुन्यांव नोंद केला.
मजगतीं, अशे तरेच्या चॅट ऍपांक नागरिकांनी बळी पडचें न्हय. अश्या चॅट ऍपांचेर दुबाव आयल्यार रोखडीच पुलिसांक म्हयती दिवची, असो उलो उपअधीक्षक देसाय हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
