भांगरभूंय | प्रतिनिधी
मे म्हयन्यांत सांपडले पांच दुयेंती
भांगरभूंय । प्रतिनिधी
पणजी : भलायकी खात्यान केल्ल्या विवीध उपाय येवजण्यांक लागून मे म्हयन्यांत गोंयांत डेंग्यूचे फक्त पांच दुयेंती सांपडिल्ले. पावसाळो सुर जाल्ल्यान ह्या म्हयन्या सावन उपाय येवजण्यांनी वाड क रतले. ते प्रमाण हॉटस्पॉटां सयत हेर वाठारांनी दर सप्तकांत जळारांची पैदास सुवातो नश्ट करतले. ते भायर नितळसाण मोहीम, घराघरांनी वचून जागृताय, तपासणी करप अशी कामां चालू आसात अशी म्हायती राष्ट्रीय वेक्टर बोर्न दुयेंस नियंत्रण कार्यावळीची उपसंचालक डॉ. कल्पना महात्मे हांणी दिली.
गोंयांत मे म्हयन्यांत म्हापशें, साळगांवां दरेकी 2 जाल्यार कांदोळे एक दुयेंती सांपडिल्लो. गोंयांत सामान्यपणान जून ते सप्टेबर म्हयन्यांत सांचून उरिल्ल्या पावसाच्या उदकांत जळारांची पैदास जाता. ताका लागून ह्या मोसमांत डेंग्यूच्या दुयेंतींचो आंकडो वाडटा. ते खातीर खात्या वतीन विशेश नितळसाण मोहीम हातांत घेतले. जळारांची पैदास अदीक प्रमाणांत जावपी वाठारांची परतून परतून नितळसाण मोहीम हातांत घेतले. अश्या वाठारांनी वेक्टर डेन्सिटी वाडची ना, हाची जतनाय घेतले. लोकांनी लेगीत आपल्या घराची, वाठाराची नितळसाण दवरप गरजेचें आसा.
गोंयांत अंदूं जानेवारी ते मे ह्या पांच म्हन्यांत डेंग्यूचे 16 दुयेंती सांपडल्यात. पोरूं ह्याच पांच म्हयन्यांत 33 जाल्यार 2024 त 117 दुयेंती सांपडिल्ले.
2026 त सांपडिल्ले चडशे दुयेंती हे स्थलांतरीत वस्तींतले आशिल्ले. ह्या वाठारांत उक्तडार उदक सांठोवन दवरिल्ल्यान तातूंत जळारांची पैदास जावन डेंग्यू दुयेंती सांपडल्यात. हेर राज्यांतले डेंग्यू हॉटस्पॉट वाठारांतल्यान स्थलांतरीत कामगार वा पर्यटक गोंयांत येतात ताका लागून गोंयांत डेंग्यूचे दुयेंती सांपडटात. ते भायर कांय शार वाठारांत लेगीत दुयेंती सांपडल्यात, अशें डॉ. महात्मे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
