भांगरभूंय | प्रतिनिधी
गोंय हॅण्डबॉल असोसिएशनान आयोजीत केल्ले राज्य ज्युनियर हॅण्डबॉल सर्तीचें वस्तादपण डॅनिएला स्पोर्ट्स क्लब आनी चब्बाईट्स पर्वरी ह्या पंगडांनी वळेरेन चल्यांच्या आनी चलयांच्या गटांत जोडलें.
सर्तीचें आयोजन फातोड्डेंच्या साग हॅण्डबॉल कोर्टाचेर केल्लें. चल्यांच्या गटांतले फायनलींत डॅनिएला स्पोर्ट्स क्लबान हॅण्डबॉल गनर्साक 22-5 गोलांनी हारयलो.
ते पयलीं जाल्ले सेमी फायनलींत डॅनिएला स्पोर्ट्स क्लबान एआयएम स्कुलाक 11-2 गोलांनी हारोवन फायनलींत सुवात मेळयिल्ली. तिसरी सुवात नुवें हॅण्डबॉलर्साक फावो जाली.
डॅनिएलाच्या क्लेस्टर कुलासो आनी रोहित वोडलर हांची वळेरेन उत्कृश्ट खेळगडो आनी सर्तींतलो उत्कृश्ट गोलकीपर म्हणून निवड जाली.
चलयांच्या गटांत चब्बाईट्स पर्वरीन नावेलीच्या डॅनिएला स्पोर्ट्स क्लबाक टॉसाचेर हारायलो. टायब्रेकरांत दोनूय पंगड 5-5 अशे बरोबरींत उरिल्ले. ते पयलीं पुर्ण वेळाच्या खेळांत दोनूय पंगड 2-2 अशे बरोबरींत आशिल्ले.
सेमी फायनलींत चब्बाईट्स पर्वरीन एआयएम स्कुलाक 6-0 अशा फरकान आनी डॅनिएला स्पोर्ट्स क्लबान हॅण्डबॉल गनर्साक 15-0 अशा गोलांनी हारयिल्लो.
चब्बाईट्स पर्वरीच्या रक्षा मठकार आनी प्रितिका शिरोडकार हांची वळेरेन उत्कृश्ट खेळगडी आनी सर्तींतली उत्कृश्ट गोलकीपर म्हणून निवड जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
