भांगरभूंय | प्रतिनिधी
पणजी, बातमीदार ः आचारसंहिता चालीक लायल्या उपरांत 16 मार्च ते 5 मे ह्या 51 दिसांनी राजकी पक्षांनी गूगल ॲड प्लॅटफॉर्मांतल्यान डिजिटल जायरातींचेर 65 लाख 9 हजार रुपया खर्च केल्यात. तातूंत गूगल सर्च इंजिन, वेगवेगळीं संकेतथळां अशा ऑनलायन माध्यमांतल्या राजकी पक्षांची जायरातींचो आस्पाव आसा. गूगल ॲडच्या गोंय विभागांत गोंयां सयत महाराष्ट्रांतली कुडाळ, सावंतवाडी, कर्नाटकांतली बेळगांव, दांडेली – अंकोला ते गोकर्ण हांचो आस्पाव आसा. ह्या विभागांत राजकी जायरात दिवपाक काँग्रेस पक्ष फुडें आसा.
गूगल ॲडान जाहीर केल्ल्या आंकड्यां प्रमाण 16 मार्च ते 5 मे ह्या काळांत वेगवेगळ्या ऑनलायन माध्यमांनी वट्ट 21 हजार 193 जायराती उजवाडाक आयल्यात. तातूंत व्हिडियो, फोटो आनी बरयल्ले संदेश वा मजकूर अशे तीन उपप्रकार आसात. ह्या तिनूय प्रकारांत काँग्रेस पक्षान 40 लाख 17 हजार रुपया खर्च केल्यात. दुसरे सुवातेर आशिल्ल्या भाजपान 20 लाख 28 हजार रुपया खर्च केल्यात. जाल्यार हेर खाजगी कंपनींनी राजकी जायरातीं खातीर सुमार 19 हजार 750 रुपया खर्च केल्यात.
लोकसभा वेंचणुके खातीर आचारसंहिता 16 मार्चा सावन लागू जाली तरी गोंय विभागांतल्यो चडशो जायराती 13 एप्रील ते 5 मे ह्या काळांत उजवाडाक आयल्यो. ह्या विभागात 29 एप्रीलाक सगळ्यांत चड 6 लाख 83 हजार रुपयांची राजकी जायराती दिल्यो. ह्या काळांत 12 एप्रीलाक सगळ्यांत उणी राजकी जायराती आयली जी फकत 1000 रुपयांची आशिल्ली. फकत एप्रील ह्या एका म्हयन्यांत राजकी जायरातीं खातीर 44 लाख 50 हजार रुपया खर्च जाल्यात. सगल्याच मतदारांक प्रत्यक्ष मेळप शक्य नाशिल्ल्यान जायरातींचो वापर करतात.
सध्याच्या डिजिटल युगांत वेगवेगळ्या डिजिटल प्लॅटफॉर्मांक म्हत्व मेळ्ळां. मोबायल, इंटरनॅट हो जिणेचो एक गरजेचो भाग जाला. लाखांनी लोकां कडेन एकाच वेळार ह्या माध्यमांतल्यान पावूं येता. देखूनच वेगवेगळे राजकी पक्ष ह्या डिजिटल प्लॅटफॉर्माचेर जायराती दितात.
व्हिडियो जाहिरातींचेर चड भर
गोंय विभागांत वेगवेगळ्या राजकी पक्षांनी व्हिडियो जायरातीचेर चड भर दिला. 16 मार्च ते 5 मे ह्या काळांत ह्या विभागांत जाल्ल्या वट्ट खर्चांतले 87.1 टक्के म्हळ्यार सुमार 50 लाख 67 हजार रुपया व्हिडियो जायरातीं खातीर खर्च जाले. फकत फोटो आशिल्ल्या जायरातीं खातीर सुमार 8 लाख 40 हजार रुपया खर्च जाल्यात, जाल्यार सुमार 25 हजार रुपया मजकूर जायरातीं खातीर खर्च जाल्यात.
मेटा जाहिरातींत भाजपा मुखार
मेटा (फेसबुक) प्लॅटफॉर्माचेर जायरातींत भाजपा फुडें आसा. 31 जानेवारी ते 29 एप्रिल 2024 ह्या काळांत भाजपान मेटाचेर 13 कोटी 40 लाख रुपयाच्यो जायराती दिल्यात. हाचे उपरांत काँग्रेसीन 6 कोटी 54 लाख, बीजू जनता दलान 1 कोटी 70 लाख, जाल्यार तृणमूल काँग्रेसीन सुमार 1 कोटी 40 लाख रुपया खर्च केल्यात.
गूगल ॲड्स वरवीं देशभरांत 111 कोटी रुपया खर्च
16 मार्च ते 5 मे ह्या काळांत देशभरांतल्या वेगवेगळ्या राजकी पक्षांनी गूगल ॲड्साचेर 111 कोटी रुपया खर्च केला. हातूंत 38.8 कोटी रुपयाच्यो जायराती दिवन भाजपा मुखार आसा. हाचे उपरांत काँग्रेस (29.6 कोटी रुपया), वाय एस आर काँग्रेस (7.4 कोटी रुपया), बीजू जनता दल (3.4 कोटी रुपया), तेलगू देसम पार्टी (3.30 कोटी रुपया) हांचो क्रमांक आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
