भांगरभूंय | प्रतिनिधी
खबरां संस्था
अहमदाबादः भारतांत अंदू ऑक्टोबर- नोव्हेंबर म्हयन्यांत जावपी वन-डे वर्ल्डकपाचें वेळापत्रक आनी थळांचीं नांवा वर्ल्ड टॅस्ट चॅम्पियनशीप फायनली (डब्ल्यूटीसी) वेळार जाहीर जावपाक शकतात. भारतीय क्रिकेट नियामक मंडळाचो (बीसीसीआय) सचीव जय शाह हाणे विशेश सर्वसादारण बसके उपरांत ही म्हायती दिली. टॅस्ट फायनल 7 जून सानव इंग्लंडांत ओव्हल मैदानार जातली. वर्ल्ड कपा खातीर 15 स्टेडियमां थारायल्यांत. तातूंत वाड जावपाक शकता अशें शाह हाणे सांगलें.
आयपीएल फायनली वेळार आशिया क्रिकेट कावंसिलाच्या वांगड्यां कडेन चर्चा करून आशिया कप क्रिकेट सर्ती विशीं निर्णय घेतले अशे ताणे सांगलें. अफगाणिस्ताना आडची माळ वन-डे वर्ल्ड कपा पयलीं जातली. सगल्या राज्यांच्या क्रिकेट मंडळा कडेन स्ट्रेंथ अॅण्ड कंडिशनींग कोच आनी स्पोर्ट्स मेडिसीन टीम आसतली. तांचो इंटरव्हू एनसीएचे पॅनल करतलें अशीय म्हायती ताणे दिली.
वन-डे वर्ल्ड कपांतली भारत आनी पाकिस्तान हांचे मदलीं हाय व्होल्टेज मॅच 15 ऑक्टोबराक अमहदाबाद हांका जावपाक शकता. वर्ल्ड कपांतली पयली मॅच 5 ऑक्टोबराक न्यूझीलंड आनी इंग्लंडा मजगती अहमदाबादच्या नरेंद्र मोदी स्टेडियमाचेर जावपाक शकता. फाटल्या वन-डे वर्ल्ड कपाचो इंग्लंड वस्ताद जाल्यार न्यूझीलंड उपवस्ताद आसा.
भारताची पयली मॅच चेन्नयत ऑस्ट्रेलिये आड जावपाक शकता. ताची तारीक अजून थारायल्ली ना. पाकिस्तान- भारत ही मॅच आयतार 15 ऑक्टोबराक जावपाक शकता. त्या दिसा पाकिस्तानाचो कॅप्टन बाबर आझमाची वाडदीस आसा. सर्तीची फायनल 19 नोव्हेबराक जावपाक शकता.
वन-डे वर्ल्ड कप 5 ऑक्टोबराच्यान जावपाक शकता. मॅची जावपाचीं 15 थळां शॉर्ट लीस्ट केल्यांत. तातूंच चैन्नय आनी कोलकाताचो आसपाव आसा. अहमदाबाद, लखनौ, मुंबय, राजकोट, बंगळुरू, दिल्ली, इंदूर, गुवाहाटी, हैदराबाद, तिरुवनंतपूरम, नागपूर, पुणे आनी धर्मशाला हांचोय तातूंत आसपाव आसा.
वन-डे वर्ल्ड कपा खातीर थेट पात्र थारिल्ले पंगड फुडले भशेन- न्यूझीलंड (175 गुण), इंग्लंड (155), भारत (139), बांगलादेश (135), पाकिस्तान (130), ऑस्ट्रेलिया (120), अफगाणिस्तान (115), दक्षीण आफ्रिका (98)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
