भांगरभूंय | प्रतिनिधी
भांगरभूंय । प्रतिनिधी
फोंडें: गोंयांत 2014 त लोकसभा वेंचणुके वेळार प्रचारांत वांटो घेतिल्ले नरेंद्र मोदी हांणी केंद्रांत भाजप सरकार सत्तेर आयल्यार कांय दिसां भितर मिना खणी सुरू करपाचें आस्वासन दिल्लें. पूण फाटल्या 10 वर्सांत डबल इंजीन म्हणपी सरकाराक मिना खणी सुरू करपाक येस येवंक ना. हे खेपे लेगीत भाजप सरकारा वतीन साबार आस्वासनांची खिरापत मेळटली. लोकांनी डबल इंजीन सरकाराच्या आस्वासनाचे भकीक पडचे न्हय, असो उलो दक्षीण गोंयचे काँग्रेसीचे उमेदवार कॅप्टन विरियातो फर्नांडीस हांणी मारला.
आयतारा 14 एप्रीलाक फोंडेंच्या वयल्या बाजारांतल्या विठोबाच्या देवळांत वचून कॅ. विरियातो हांणी साबार कार्यकर्त्यां सयत वचून आशिर्वाद घेतलो. तांचे वांगडा गोवा फॉरवर्डाचे उपाध्यक्ष दुर्गादास कामत, काँग्रेसीचे राजेश वेरेंकार, अॅड. ह्रदयनाथ शिरोडकार, शब्बीर मुल्ला, अरूण गुडेकार आनी हेर कार्यकर्ते व्हड संख्येन हाजीर आशिल्ले.
डबल इंजीन सरकार दाबोळी विमानतळ बंद करून विमानतळाचें खाजगीकरण करपाच्या यत्नांत आसा. तशेंच सरकाराच्या घाळपणाक लागून म्हादय न्हंयेचें अस्तित्व धोक्यांत आयलां. प्रचारा वेळार लोकांचो उत्स्फूर्त प्रतिसाद मेळटा, ताका लगून जैत निश्चीत आसा, अशें कॅ. विरियातो हांणी सांगलें.
दुर्गादास कामत हांणी सांगलें, गोंयांत सध्या गुन्यांवकारी व्हड प्रमाणांत वाडल्या. खून, ड्रग्स, बलात्कार, फारपेट आनी हेर गुन्यांव वाडल्यात. सरकारान लोकांचो अपेक्षाभंग केला. ते खातीर लोकां मदीं सरकारा विशीं सध्या निरेशवणी पातळ्ळ्या. लोकसभा वेंचणुकेंत भाजपाक घरा धाडपाक लोक तयार रावल्यात, अशें तांणी सांगलें. फोंडें म्हालांतले चारूय मंत्री लोकांच्यो अपेक्षा पुराय करपाक पुराय अपेशी थारल्यात. ताका लागून म्हालांत हे खेपे काँग्रेस उमेदवाराक घसघशींत भोवमतांची आघाडी मेळटली, अशें राजेश वेरेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
