भांगरभूंय | प्रतिनिधी
पणजी : म्हापशें पुलिसांनी कदंब बस स्टेशनाचेर छापो घालून दोगां युगांडीयन विद्यार्थ्यां कडल्यान २० लाखांचो कोकेन जप्त केल्लो. हे विशीं प्रथमदर्शनी परिस्थितीजन्य पुरावो आशिल्ल्याचे निरीक्षण नोंद करून न्यायालयान सेंतामू एल्वीज आनी उमर लुक्वागो ह्या दोगा विद्यार्थ्यांचो जामीन अर्ज भायर मारलो. हे विशींचो आदेश म्हापशेंच्या अतिरिक्त सत्र न्यायाधीश बॉस्को रॉबर्ट हांणी दिला.
दोन विदेशी युवक पुणेच्यान गोंयांत ड्रग्स घेवन येता अशी म्हायती गुप्तहेरांनी म्हापशें पुलिसांक दिल्ली. ते प्रमाण, म्हापशें पुलिसांचे निरीक्षक निखिल पालेंकार हांच्या मार्गदर्शना खाला उपनिरीक्षक यशवंत मांद्रेंकार, बाबलो परब, आदित्य गाड, मंगेश पाळणी आनी हेर पंगडान १६ ऑगस्टाक रातचो कदंब बस स्टॅण्डाचेर छापो घातलो. तेन्ना पंगडान सेंतामू एल्वीज आनी उमर लुक्वागो ह्या दोगां विद्यार्थ्यांक ताब्यांत घेवन तांची चवकशी केली. तेन्ना सेंतामू हाचे कडल्यान पंगडान १०३ ग्रॅम कोकेन जाल्यार उमर हाचे कडल्यान १०२ ग्रॅम कोकेन जप्त केल्लें. त्या ड्रग्जची आंतरराष्ट्रीय बाजारांत किमत २०.५ लाख रुपया आसा. उपरांत पंगडान वयल्या दोगां विद्यार्थ्यांक अटक केल्ली.
मजगतीं, दोगां दुबावितांनी पणजेच्या उत्तर गोंय जिल्लो आनी सत्र न्यायालयांत जामीन अर्ज करून तांचे आड बनावट गुन्यांव दाखल करून फटींग प्रकरणांत अडकयिल्ल्याचो दावो केलो. हे विशीं न्यायालयांत सुनावणी जाली तेन्ना, जप्त केल्ल्या ड्रग्जाचो अहवाल सकारात्मक आयिल्ल्याचो दावो पुलिसांनी केलो. हे विशीं प्रकरणी न्यायालयान दोनूय पक्षांची बाजू आयकून घेतले उपरांत वयलें निरीक्षण नोंद करून दोगांयचो जामीन अर्ज भायर मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
