भांगरभूंय | प्रतिनिधी
काँग्रेस शिश्टमंडळान भेटयलें ‘एसजीपीडीए’क निवेदन
भांगरभूंय । प्रतिनिधी
मडगांवः मडगांवच्या एसजीपीडीए ठोक नुस्ताय मार्केट वेर्ण्यां उद्देगीक वसणुकेंत स्थलांतरीत केल्यार गांवागांवांत भोंवून नुस्तें विक्रेत्यांक नुस्तें खरेदी खातीर वेर्ण्यां वचप परवडचें ना. विक्रेत्यांचे मागणे प्रमाण मार्केटा कुशीक एकादी शेड उबारून मार्केट चालू दवरचें, अशी मागणी काँग्रेसीच्या शिश्टमंडळान एसजीपीडीए कडेन केल्या.
काँग्रेसीचे फुडारी एल्वीस गोम्स, योगेश नागवेंकार आनी हेर कार्यकर्त्यांच्या शिश्टमंडळान शुक्रारा एसजीपीडीएच्या कार्यालयांत वचून अधिकाऱ्यांची भेट घेतली. तांकां निवेदन दिवन नुस्तेंकार आनी विक्रेत्यांक त्रास जातलो, हे खातीर एसजीपीडीए ठोक नुस्ताय मार्केटाचें स्थलांतर करचें न्हय, अशी मागणी केली.
एसडीपीडीएचें मार्केट निरिक्षक रोहन नावेलकार हांणी सांगलें, अजून ठोक नुस्त्या मार्केटाचें स्थलांतर वेर्णें उद्देगीक वसणुकेंत करपाचें निश्चीत जावंक ना. अजून प्रस्तावाचेर विचार चल्ला. हाचेर एल्वीस गोम्स हांणी सांगलें, सरकार जो निर्णय घेता ताचो लोकांचेर कसलो परिणाम जातलो हाचो विचार करपाची गरज आसा. लोकांक विस्वासांत घेवन निर्णय घेवपाची गरज आसा. इमारतीच्या दुसऱ्या पांवड्या वयल्या कामां खातीर मार्केटाची सुवात जीएसआयडीसी कडेन दिवपा खातीर ठोक नुस्त्य मार्केट वेर्णे उद्देगीक वसणुकेंत स्थलांतरीत केल्यार ह्या मार्केटांतलें नुस्तें घेवन गांवागांवांत भोंवून विकपी लुमार एक हजार विक्रेत्यांचेर व्हड परिणाम जातलो. हेच खातीर नुस्तेमार आनी विक्रेत्यांक विस्वासांत घेवन मार्केटाचे कुशीक एकादी शेड उबारून तात्पुरत्या स्वरुपांत मार्केट चालू दवरचें. मार्केटांतले नुस्तेकार आनी विक्रेत्यांच्या विचारा प्रमाण हे संबंदांत निर्णय घेवचो, अशी मागणी एसजीपीडीए कडेन केल्या, अशें गोम्स हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
