भांगरभूंय | प्रतिनिधी
वाळपयः अपेक्षे प्रमाण ठाणेच्या सरपंचपदार निलेश परवार हांची बिनविरोध निवड जाली. शुक्रारा 15 मार्चाक सकाळीं पंचायत कार्यालयांत सरपंचपदा खातीर वेंचणूक घेतली.
वेंचणूक अधिकारी म्हूण वाळपय गटविकास कार्यालयाचे अधिकारी लक्ष्मण नायक हाजीर आशिल्ले. सरपंचपदा खातीर निलेश परवार हांचो एकमेव अर्ज दाखल जाल्लो. छाननी प्रक्रिये उपरांत तो अर्ज वैध्य थारायले परांत परवार हांची बिनविरोध निवड जाल्ल्याची घोशणा वेंचणूक अधिकारी नायक हांणी केली.
ह्या वेळार सगळे पंच वांगडी हाजीर आशिल्ले. पंचायत वेंचणुको जाले उपरांत हे पंचायतीच्या सरपंचपदार सरिता गांवकार हांची बिनविरोध निवड जाल्ली. अलिखीत कबलाती प्रमाण दोन वर्सांनी तांणी आपल्या पदाचो राजिनामो दिलो.
सरपंचपदार निवड जाले उपरांत परवार हांणी सांगलें, सरिता गांवकार हांणी दोन वर्सां बरे तरेन कारभार सांबाळ्ळो. सगळ्या सांगात्यांच्या आदारान पंचायतीचो कारभार फुडें व्हरपाचो आपूण यत्न करतलों, अशें तांणी सांगलें. ह्या वेळार उपसरपंच तनया गांवकार, पंच सुरेश आयकार, सुभाष गावडे, विनायक गांवस, सरिता गांवकार, अनुष्का गांवस, प्रेमिला गांवकार, सोनिया गांवकार हांची हाजेरी आशिल्ली. पंचायत सचीव सर्वेश गांवकार आनी कारकून उत्तम गांवकार हांणी वेंचणूक अधिकाऱ्याक विशेश मजत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
