भांगरभूंय | प्रतिनिधी
भांगरभूंय । प्रतिनिधी
वाळपयः ठाणे बॉयजान आयोजीत केल्ले फुटबॉल सर्तीचें पर्येची आमदार डॉ दिव्या राणे हिणे उक्तावण केलें. गांवगिऱ्या वाठारांत तरतरेच्यो सर्ती जावपाक जात. ताका लागून भुरग्यांक आपले कला आनी खेळां गुणाची उदरगत करपाक वाव मेळटा. ठाणे बॉयज फाटल्या आठ वर्सां सावन सर्ती आयोजीत करपाचे तोखणाय करपा सारकें काम करता अशें तिणे सांगलें.
कार्यावळीक केरीची जिल्हो पंचायत वांगडी देवयानी गांवस, ठाणेची सरपंच सरिता गांवकार, विनोद शिंदे, उदय सावंत, आदलो जिल्हो पंचायत वांगडी पांडुरंग गावस, उपसरपंच तनया गांवकार पंच वांगडी सुभाष गावडे तशेंच सर्तींत वांटो घेवपी पंगडाचें धनी नंदेश परवार, प्रदीप पर्येकार, संतोष गांवकार, महादेव सावंत आनी आराध्य पाटील हाजीर आशिल्ले. शिक्षण, पर्यावरण, संस्कृतीचे दिश्टिकोनांतल्यान सत्तरी तालुको अग्रेसर जावचो हे खातीर तालुक्याचे सांस्कृतीक उदरगती खातीर रवींद्र भवन प्रकल्प उबारची मागणी उदय सावंत हाणे केली. ठाणे वाठारातं मैदान उबारपाची मागणी सरिता गांवकारान केली.
गोंय फुटबॉल उदरगत म्हामंडळाचो ठाणे हांगा फांटो सुरू करपाची मागणी ठाणे बॉयजाचो अध्यक्ष पांडुरंग गांवकारान केली. ह्या वेळार ठाणे बॉयजान घेतिल्ल्या तरेकवार सर्तींतल्या जैतिवंतांक मानेस्ताचे हस्तुकीं इनामां भेटयलीं. कार्यावळीचें सूत्रसंचालन अभय गांवकारान केलें. यशवंत गांवकारान उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
