भांगरभूंय | प्रतिनिधी
पांच वर्सां चलतलें काम; पुणेच्या वनराई संस्थेचो उपक्रम, नाबार्ड संस्थेचो अर्थीक आदार
भांगरभूंय । प्रतिनिधी
वाळपयः उदक आडयात, उदक जिरयात उपक्रमा खाला पुणेच्या वनराई संस्था, ठाणें पंचायत आनी नाबार्ड संस्था हांच्या जोडपालवान ठाणे पंचायत वाठारांतल्या सगळ्या गांवांतली सैमीक स्रोत, झरी हांचें संवर्धन जातलें. फुडल्या पांच वर्सां खातीर ह्यो तिनूय संस्था एकवटीत काम करतल्यो. ह्या सैमीक स्रोतांचें पुनर्जिवीत करतले. ताची 20 मार्चाक सुरवात जाली.
ह्या उपक्रमाची हिवरे गांवांतल्यान सुरवात जाली. गांवांतल्या साबार बायलांनी आनी नागरिकांनी श्रमदान करून उपक्रमाक सुरवात करून दिली. फुडले पांच दीस ह्या गांवांतले लोक श्रमदान करून ह्या गांवांत आशिल्ल्या सैमीक झऱ्यांचें पुनर्जिवीत करतले. फाटल्या कितल्याशाच वर्सां सावन ह्या गांवांत एक सैमीक झरो आसा. मात ताचे कडेन कितल्याशाच वर्सां सावन आडनदर जाल्ल्यान तो पुरायपणान ना जाला.
ज्येश्ठ नागरिका कडल्यान मेळिल्ले म्हायती प्रमाण ह्या झऱ्याच्या उदकाचेर हिवरे गांवांतल्यो शेती बागायती फुलताल्यो. तशेंच ह्या झऱ्याच्या उदकाचो वापर ह्या गांवांतले लोक पियेवपा खातीर करतले. कालांतरान सरकारान ह्या गांवांत नळा वरवीं उदकाची वेवस्था केल्ल्यान ह्या झऱ्या कडेन आडनदर जाली.
उदक हो म्हत्वाचो घटक आसा. फुडले पिळगे खातीर आमी उदक सांबाळून दवरलें नात जाल्यार तांचे मुखार साबार तरांच्यो आडखळी निर्माण जावपाक शकतात. ताका लागून ठाणे पंचायतीन फुडाकार घेवन उदक आडायात, उदक जिरयात ही येवजण चालीक लावपाचो निर्णय घेतला. ह्या वावरांत पुणेची वनराई संस्था आदार करतली जाल्यार नाबार्ड संस्था अर्थीक फाटबळ दितली.
हे संबंदांत गांवची सरपंच सरिता गांवकार हांचे कडेन संपर्क केलो. त्या वेळार तांणी सांगलें, ठाणें पंचायत वाठारांतल्या सगळ्या गांवांनी ही येवजण चालीक लायतले. सध्यातरी हिवरे गांवांतल्यान हाची सुरवात केल्या. ते उपरांत गोळावली, रिवे, पाली, ठाणे, चरावणें ह्या वाठारंतूय अशे तरेचे उपक्रम हातांत घेतले.
पयले पांच दीस संबंदीत वाठारांतल्या लोकांनी श्रमदानांतल्यान त्या वाठाराची नितळसाण करप गरजेचें आसता. ते उपरांत फुडलीं चार वर्सां वनराई संस्था पुराय जापसालदारकी घेतली. पांच वर्सां उपरांत ह्या वाठारांतले सगळे सैमीक झरे, तळीं पुनर्जिवीत जातल्यो. ते खातीर वनराई आनी नाबार्ड ग्यो संस्था बरो आदार करतली. लोकांनी ह्या वावराक आदार करचो, असो उलो सरपंच गांवकार हांणी मारलो. ह्या वेळार आयोजीत केल्ले कार्यावळींत प्रकल्प वेवस्थापक ऋषिकेश दुरम हांचे सयत थळावे पंच अनुष्का गांवस, निलेश परवार, तनया गांवकार, सुरेश आयकार, विनायक गांवस, पंचायत सचीव सर्वेश गांवकार, कारकून उत्तम गांवकार आनी हेर मानेस्त हाजीर राविल्ले.
हरीत क्रांतीचो मार्ग जातलो मेकळोः ऋषिकेश दुरम
पुराय संवसारांत पियेवपाच्या उदकाचो व्हड उणाव निर्माण जाला. अशा वेळार गोंयच्या सत्तरी म्हाला सारक्या उत्कृश्ट जैवविविधता आशिल्ल्या वाठारांनी उदकाचे स्रोत संवर्धीत करपाची गरज आसा. हे खातीर अशे तरेचो उपक्रम वनराई संस्थेन ह्या वाठारांत हातांत घेतला. पांच वर्सां खातीर हो उपक्रम हातांत घेतले. तातूंत पंचायत वाठारांतल्या सगळ्या गांवांतले सैमीक उदकाचे स्रोत पुनर्जिवीत करतले. ताका लागून फुडारांत ह्या उदकाच्या सांठ्याचेर ह्या वाठारांतलीं शेतां, बागायती परतून एकदां उब्यो रावतल्यो. गांवचो हरीत क्रांतीचो मार्ग मेकळो जातलो, अशें ह्या उपक्रमा संबंदांत उलयतना प्रकल्प वेवस्थापक ऋषिकेश दुरम हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
