भांगरभूंय | प्रतिनिधी
हरमल, बातमीदार: मांद्रें मतदारसंघाच्या इतिहासीक म्हत्व आशिल्ल्या केरी- तेरेखोल गांवचे उदरगतींत खुबश्या गजालींचो आस्पाव आसा. तेरेखोल न्हंय आनी नामनेचो दर्या तशेंच थंय आशिल्ल्या सुरूंचे बागेक लागून हांगा देश- विदेशांतले पर्यटक भेट दितात. अश्यो दर्यादेगो राखपा खातीर ’टेट्रा पॉड’ संकल्पना घातकी थारल्या. हो गांव नश्ट करपाचो यत्न कांय लोक करतात. कोट्यांनी रुपया हांगा खर्च करून केल्लीं कामां म्हळ्यार जनतेच्या पयशांचो इबाड, अशी तिडकीची भावना हांगाचे लोक सध्या उक्तायतात.
ही दर्यादेग राखपा खातीर सुमार ७० कोटी रुपया खर्च केल्ल्याची म्हायती मेळ्ळ्या. खरें म्हळ्यार दर्यादेगेची राखण करपाची काळाची आनी ग्रामस्थांची जापसालदारकी वळखून प्रस्तावीत कामाक विरोध केल्ल्याचें वेवसायीक तशेंच समाजकार्यकर्ते विलास आरोलकार हांणी सांगलें.
तेन्ना केंद्रीय उदकास्त्रोत खात्या वरवीं ह्या कामाची निविदा थळावे स्वराज संस्थेक विश्वासांत घेनासतना करून कामूय पुराय केल्ल्याचें दिसता. पूण ताचो परिणाम आयज थळाव्यांक भोगचो पडटा, अशें स्पश्ट करून ‘टेट्रा पॉड’ ही आधुनीक पद्धतीची तंत्रज्ञानयुक्त उपाययेवजण आशिल्ल्याचो दावो संबंदीत खात्यान केल्लो. ताची तर्कशुद्धता कितली शास्त्रीय आशिल्ली हें दिसून आयिल्ल्याचें आरोलकार हांणी म्हणलें.
‘टेट्रा पॉड’ प्रयोग ’फेल’
दर्यदेगांची राखण ही काळाची गरज. ताका लागून नव्यो नव्यो पद्धती आपणावन घेतल्यात. टेट्रा पॉडाक लागून ल्हारांच्या नेटान पॉड सकयली माती व्हांवून वता आनी पॉड रेंवेंत वतात. उपरांत राखणे वणट व्हांवून वता. पांयवाट खचिल्ल्यान दर्यादेग ल्हारां गिळटात, असो भंय तांणी उक्तायलो.
केरी गांवची राखण आनी नामनेच्या दर्यादेगेचें अस्तित्व तिगोवन दवरपा खातीर तशेंच केरी गांवचे उदरगतीचेर थळाव्यांनी लक्ष घातलां. तांचे हे भुमिकेचेर आमदार जित आरोलकार हांची सहमती मेळिल्ल्यान ग्रामस्थान समाधान उक्तायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
