टॅस्ट सर्तींत भारताक जैताची चड संद

भांगरभूंय | प्रतिनिधी

वर्ल्ड टॅस्ट चॅम्पियनशिपी (डब्ल्यूटीसी) खातीर दोन दिसां पयलीं भारतीय पंगड वेंचून काडला. 6 जून सावन हे सर्तीची निमाणी मॅच भारत आनी ऑस्ट्रेलिये मदीं लंडनांतल्या लॉर्डस मैदानाचेर जातली. टॅस्ट चॅम्पियनशिपाचे फायनलींत ऑस्ट्रेलियेन आपलो पंगड पयलींच वेंचून काडला. आतां भारतानय आपलो 15 वांगड्याचो पंगड जाहीर केल्ल्यान हे निमाणे मॅचीची उमेद, उमळशीक खूबच वाडल्या. भारतान वेंचून काडिल्ल्या 15 खेळगड्यांतल्यान कॅप्टन रोहित शर्मा, शुभमन गिल, चेतेश्वर पुजारा, विराट कोहली, के एल राहुल, मुहम्मद शमी, मुहम्मद सिराज, उमेश यादव, के एस भारत, आर अश्विन, रविंद्र जडेजा, अक्षर पटेल हांची निवड जावपाची खात्रीच आशिल्ली. कारण तांणी फाटल्या वर्सा बरी कामगिरी केल्ली. उरिल्ल्या तीन जाग्यां खातीर जयदेव उनाडकट, शार्दूल ठाकुर आनी अजिंक्य रहाणे हांकां वेंचून काडून संतुळीत पंगड वेंचपाचो यत्न निवड समितीन केला.
पोरूं निवड समितीन टॅस्टींत पांचव्या क्रमांका खातीर जायते प्रयोग केल्ले. हनुमा विहारी, अजिंक्य रहाणे, सूर्यकुमार यादव आनी श्रेयस अय्यर हांकां निवड समितीन ह्या क्रमांकाचेर संद दिली. श्रेयस अय्यरान ह्या क्रमांकाचेर खेळपाक येवन खूब धांवड्यो केल्यो. पूण फाटल्या कांय दिसां सावन ताका दुखापत जाल्ल्यान हे सुवातेर कोणाची निवड जातली, हाची उमळशीक आशिल्ली. निवड समितीन निमाणे अजिंक्य रहाणेक संद दिवन ती सोंपयली. फाटल्या कांय दिसांनी आपल्या पोरण्या फाॅर्मांत परतून आयिल्ल्यान अजिंक्य रहाणेची निवड जावपाची अपेक्षा आशिल्ली. सध्या तो सामको फाॅर्मांत आसा. आयपीएलांत चेन्नई सुपर किंग्स खातीर तो सध्या खोटल्यांनी धांवड्यो करीत आसा. अजिंक्य आतां बदलिल्ल्या अवतारांत दिसता. फकत आयपीएल न्हय तर ताणें रणजी ट्रॉफींत धांवड्यो केल्यात आनी इंग्लंडांतल्या लॉर्ड्स मैदानाचेर खेळपाचोय ताका अणभव आसा. इंग्लंडांतल्या काउंटी सर्तींनी खेळून ताणें आपलो फॉर्म परतून मेळयला. देखून ताची निवड अपेक्षीत आशिल्ली. निवड समितीन अजिंक्याक संद दिवन भारताची बॅटिंग घटमूट करपाचो यत्न केला. निमाणे मॅचींत ताच्या अणभवाचो आमकां फायदो जातलो हें निश्चीत.
हे निमाणे मॅची खातीर निवड समितीन पांच बॅटसमन वेंचून काडल्यात, ते अशे- रोहित शर्मा, शुभमन गिल, चेतेश्वर पुजारा, विराट कोहली, अजिंक्य रहाणे. हे पांचूय जाण निमणे मॅचींत खेळटले. के. एस. भारत आनी के. एल. भारत हे पंगडांतले दोन विकेटकीपर आसून अर्थांत तातूंतलो एक विकेटकीपर निमाणे मॅचींत वेंचून काडटले. के एल राहुल फलंदाज म्हणून बरो आनी के एस भारत विकेट कीपर म्हणून बरो म्हणून दोगांय मदल्यान विचार करून निवड करपाचो पेज पंगड वेवस्थापनाचेर आसतलो, पूण के एल राहुलाक सध्या चड संद आसा, अशें म्हजें मत. कारण ताणें लॉर्ड्स मैदानाचेर हाचे आदीं बरी कामगिरी केल्या.
चार फास्ट बाॅलरां मदल्या मुहंमद शमी, मुहंमद सिराज, उमेश यादव, जयदेव उनाडकट, शमी आनी सिराज हांची निवड जावपाची खात्री आसा. रविचंद्रन आश्विन, रविंद्र जडेजा, अक्षर पटेल आनी शार्दूल ठाकुर हे चार ऑलराउंडर आसात. तातूंतले तीन फायनलींत खेळटले. म्हणल्यार पंगडाक पांच बॅटसमन, एक विकेट कीपर, दोन फास्ट बॉलर आनी तीन ऑलराउंडर आसतले. अर्थांत आश्विन, जडेजा, अक्षर पटेल हे स्पिनर आसले तरीय फाटल्या कांय वर्सांनी तांणी बॅटिंगेत फिशालकाय दाखयल्या. देखूनच आतां तांकां ऑलराउंडर म्हणून वळखतात, म्हणल्यार आमच्या पंगडांत ऑलराउंडर खूब आसात आनी… निमाणे मॅचींत हे ऑलराउंडर ‘एक्स फॅक्टर’ थारूं
शकतात.
निवड समितीन वेंचून काडिल्ले सगळे पंदरा खेळगडे अणभवी आसात. भारत आनी अक्षर पटेल सोडल्यार सगळ्या खेळगड्यांक इंग्लंडांत खेळपाचो अणभव आसा. देखून फायनलींत भारत चड फेव्हरेट आसा. अर्थांत, ऑस्ट्रेलियाय पुराय बळग्यान मैदानांत प्रवेश करतली. ताका लागून ही मॅच सामकी रंगतली, हातूंत दुबाव ना. दोनूय पंगड एक से बढकर एक आसात. दोनूय पंगडांनी वर्सभर बरी कामगिरी करून निमाणे फेरयेंत प्रवेश केला. फाटल्या वर्साय भारत फायनलींत पाविल्लो, पूण न्यूझीलंडा कडल्यान हारिल्लो. ते मॅचींत जाल्ल्यो चुको भारतान टाळ्ळ्यो आनी सगळे खेळगडे आपल्या पूर्ण क्षमतेन खेळ्ळे जाल्यार आमचो पंगड टॅस्टींत अजिंक्य जावंक शकता. निमाण्या मॅची खातीर भारतीय पंगडाक पयलींच परबीं दिवया.

श्याम ठाणेदार
9922546295