भांगरभूंय | प्रतिनिधी
खबरां संस्था
रांचीः पयल्या डावांत बरी खेळी करून दुसऱ्या डावांत भारतीय बॉलरांक शरण वचपाचो प्रकार इंग्लंड पंगडा बाबत तिसरे फावट घडलो. ताका लागून पांच टॅस्ट मॅचींचे हे माळेंत 3-1 अशी निर्णायक आघाडी घेवपा खातीर भारताक आतां फकत 152 धांवड्यो जाय. राचींच्या चवथे टॅस्ट मॅचींच्या तिसऱ्या दिसा इंग्लंड आपल्या दुसऱ्या डावांत फकत 145 धांवड्यो करपाक शकलो. पयल्या डावांतल्या इंग्लंडाच्या 46 धांवड्याची आघाडी धरून भारताक जैता खातीर 192 धांवड्यो करपाक जाय. भारतान आपल्या दुसऱ्या डावांत खेळ सोप मेरेन नाबाद 40 धांवड्यो केल्ल्यान तांकां जैता खातीर आनी फकत 152 धांवड्यो जाय. रोहीत शर्मा आनी यशस्वी जयस्वाल खेळटात.
तिसऱ्या दिसाच्या तिसऱ्या सत्रांत रविचंद्रन आश्विन आनी कुलदीप यादवान इंग्लंडाचो दुसरो डाव 35.5 ओव्हरींत 145 धांवड्यांत सोपयलो. आश्विनान 4 जाल्यार कुलदीपान 4 विकेटी घेतल्यो. इंग्लंडान पयल्या डावांत 353 धांवड्यो केल्ल्यो. भारताचो पयलो डाव आयतारा सकाळीं 307 धांवड्यात सोपलो. पयल्या डावांत इंग्लंडाक 46 धांवड्याची आघाडी मेळ्ळी. पूण तांचो दुसरो डाव कोसळल्ल्यान भारताक जैता खातीरते फकत 192 धांवड्यो करपाचें आव्हान दिवपाक शकले.
भारतान सोमाराक चवथ्या दिसा ही मॅच जिखल्यार तांकां 3-1 अशी आघाडी मेळटली आनी पांच टॅस्ट मॅचींची ही माळ तांच्या नांवर जातली. पयली टॅस्ट इंग्लंडान सहज जिखल्ली. दुसरी आनी तिसरी टॅस्ट भारतान जिखल्यात. आश्विनान 51 धांवड्यांत 5, कुलदीप यादवान 22 धांवड्यांत 4 आनी रवींद्र जडेजान 56 धांवड्यांत 1 विकेट घेतली.
इंग्लंडाची दुसऱ्या डावांत सुरवेक सांवन घसरगुंडी सुरू जाली. खेळपट्टेर चेंडू स्पीन जातात हें पळोवन कॅप्टन रोहीत शर्मान आर आश्विनाच्या हातांत बॉल दिलो आनी ताणे इंग्लंडाचो ओपनर बेन डकेट (15) आनी उपरांत ऑली पोपाक शून्याचेर एलबीडब्ल्यू करून इंग्लंडाची स्थिती 2 आवट 19 अशी केली. ज्यो रुट (11) हाकाय आश्विनान एलबीडब्ल्यू. दुसरो ओपनर झॅक क्रावली आनी जॉनी बेअरस्टो हांणी डाव मात्सो साल्वार केलो. कुलदीपान क्रावलीक बोल्ड करून ही जोडी फोडली. हे जोडयेन चवथे विकेटी खातीर 45 धांवड्यांची भागिदारी केली. कॅप्टन बेन स्टोक्सान (4) कुलदीपाक आपली विकेटी दिली. बेन फॉक्सान 17 धांवड्यो केल्यो. इंग्लंडाच्या 6 बॅट्समनानीं दोन आंकडी धांवड्यो लेगीत केल्यो नात. झॅक क्रावलीन सगल्यांच चड 60 धांवड्यो केल्यो. ताणे ते खातीर 91 बॉल खेळून 7 चौके मारले. इंग्लंडाचो दुसरो डाव 145 धांवड्यांत सोपलो.
तिसऱ्या दिसाचो खेळ सोपलो तेन्ना भारतान 192 धांवड्याच्या लक्ष्याचो फाटलाव करतना 8 ओव्हरींत नाबाद 40 धांवड्यो केल्यात. रोहीत शर्मा 24 आनी यशस्वी जयस्वाल 16 धांवड्यार खेळटात. चवथ्या दिसा भारताक जैता खातीर आनीक 152 धांवड्यो करच्यो पडटल्यो. इंग्लंडाक जैत मेळोवपाचें आसल्यार 10 विकेटी घेवच्यो पडटल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
