भांगरभूंय | प्रतिनिधी
पेडणें, प्रतिनिधी: पेडणेंच्या टॅक्सीकारांच्यो मागण्यो मुख्यमंत्री दो. प्रमोद सावंत हांणी येत्या शुक्रारा मेरेन सोडोवच्यो, नाजाल्यार आयतारा २१ जुलयाक व्हड आंदोलन करपा खातीर पेडण्यां सभा आयोजीत करतले. ताचे उपरांत जावपी परिणामाक सरकार जापसालदार आसतलें अशी शिटकावणी अॅड. अमित सावंत हांणी पेडण्यां घेतिल्ले पत्रकार परिशदेंत दिली.
पेडणें शेतकरी सोसायटीच्या सभाघरांत आयोजीत पत्रकार परिशदेंत मांद्रेंचे आदले सरपंच तशेंच आतांचे पंच वांगडी अमित सावंत उलयताले. ह्या वेळार तांचे वांगडा टॅक्सी वेवसायीक कृष्णा नायक, कृष्णा कुमार परब हाजीर आशिल्ले.
अॅड. सावंत हांणी सांगलें, मुख्यमंत्री प्रमोद सावंत हांणी पेडणेंच्या टॅक्सीकार भावांक भुलयल्यात. ताका लागून पेडणेंच्या टॅक्सी वेवसायिकांनी एकठांय येवप ही काळाची गरज आसा. पेडणें तालुका टॅक्सी वेवसाय बचाव मंच ह्या नांवान हो मंच स्थापन केला. तो राजकी पक्ष न्हय. टॅक्सीकारांच्यो ज्यो समस्या आसात, तांच्यो अडचणी आसात त्यो सोडवपा खातीर ह्या मंचाची स्थापना केल्या, अशें अमित सावंत हांणी सांगलें.
पेडणेंच्या टॅक्सीकार भावांच्यो समस्या सोडोवपा खातीर हो मंच आतां काम करतलो. सगळ्या टॅक्सीकारांचो एकवट गरजेचो. मुख्यमंत्री हे पेडणेंचे पालक मंत्री. ताका लागून आमी तांकां उलो मारतां. तांणी येवपी शुक्रार मेरेन टॅक्सीकाराचो विशय सोडोवंचो. २१ तारखेर सभेचें आयोजन करतले. हे सभेक सरकारा आड फुडलें पावल कितें घेवचें हें थारयतले, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
