भांगरभूंय | प्रतिनिधी
-अमेरिकेंत न्यूयॉर्कांत 8 वा 9 जून दिसा मॅच जावपाची शक्यताय
नवी दिल्लीः भारत आनी पाकिस्तान हे जगांतले दोन खडेगांठ क्रिकेट पंगड. जेन्ना हे दोनूय पंगड एकामेका आड खेळटात, तेन्ना जगांतल्या दरेक क्रिकेट मोग्याक तांचे मदीं खेळिल्ल्या मॅचीची खोस घेवपाची उमळशीक आसता. कारण भारत-पाकिस्तान मॅचींत जो थरार पळोवपाक मेळटा तो ह्या दोन देशांतल्या हेर खंयचेच मॅचींत दिसना.
2023 तले संवसारीक सर्तींत हे दोन पंगड खेळिल्ले. तातूंत भारतान जैत मेळयिल्लें. आतां ह्या दोन शेजारी देशांत आनीक एका मॅचीचें वेळापत्रक उजवाडाक आयलां.
भारत आनी पाकिस्तान हांचे मदली फुडली टी-20 संवसारीक करंड सर्तीतली मॅच 2024 त आसतली. दोन देशांचे कोट्यांनी क्रिकेट मोगी हे मॅचीची उमळशिकेन वाट पळयतात. मेळिल्ले म्हायती प्रमाण, टी-20 संवसारीक करंड सर्ती मजगतीं, न्यूयॉर्कांत भारत आनी पाकिस्तान हांचे मदीं मॅच दिसा खेळयतले. भारत आनी पाकिस्तानच्या कोट्यांनी क्रिकेट माेग्यांक हें मॅचीची खोस घेवपाक मेळची हे खातीर हो निर्णय घेतला. अमेरिकेंतल्या न्यूयॉर्कांत 8 वा 9 जून दिसा ही मॅच जावपाची शक्यताय आसा.
भारत आनी पाकिस्तान हांचे मदीं हालींच 3 मॅची खेळयिल्ल्यो. आशिया करंड 2023 त दोन मॅची आनी संवसारीक करंड 2023 त एक मॅच. भारतान दोन मॅची जिखिल्ल्यो जाल्यार एक मॅच पावसाक लागून व्हावलीं. पूण ह्या दोन देशां मदीं निमाणी मॅच टी-20 संवसारीक करंड 2022 त जाल्ली. हें मॅचींत विराट कोहलीन 82 धांवड्यांची नाबाद खेळी केल्ली आनी भारताक जैत मेळोवन दिल्लें.
भारत आनी पाकिस्तान हांचे मदले राजकी संबंद बरे नात. हाचो परिणाम क्रिकेटीचेरूय जाला. परिणामी 2012 पसून दोनूय देशां मदीं कसलीच क्रिकेट मॅच जावंक ना. भारत आनी पाकिस्तान आतां फक्त आशिया करंड वा संवसारीक करंड सर्ती मजगतीं एकामेका आड खेळटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
