भांगरभूंय | प्रतिनिधी
खबरां संस्था
नवी दिल्लीः आयसीसी टी-20 वर्ल्ड कप 2024 सर्त सुरू जावपाक अजून तीन म्हयन्या परस चड तेप आसा. मात हे सर्तींत भारत आनी पाकिस्तान हाचे मदीं जावपी मॅच पळोवपाक गर्दी जाता. एका अहवाला प्रमाण आयसीसीन जाहीर केल्ल्या तिकिटां परस दोनशें पट चड लोकांनी तिकिटी मेळोवपा खातीर नोंदणी केल्या. ताका लागून लाखांनी लोकांक अमेरिकेंत जावपी ही मॅच प्रत्यक्ष मैदानार वचून पळोवपाक मेळची ना.
भारत- पाकिस्तान मॅच कितलेय पयशे दिवंन पळोवपाची क्रिकेट मोगींची तयारी आसा आनी ती तांकां स्टेडियमांत वचून पळोवपाची आसा. वर्ल्ड कप सुरू जावपाक तीन म्हयने आसात तरी तिकिटां खातीर आतां सावन सर्त लागल्या. भारत आनी पाकिस्ताना मदली मॅच न्यूयॉर्कांत जातली. त्या स्टेडियमांत फकत 34 हजार लोक बसपाक शकतात. तिकिटां खातीर दोनशे पट चड लोकांनी मागणी नोंद केल्ल्यान चडश्या लोकांक स्टेडियमांत वचपाक मेळचें ना हे आतांच स्पश्ट जालां.
स्टेडियमाची तांक एक लाख प्रेक्षकां मेरेन वाडयली तरी सगलीं तिकिटी विकतली. भारत- पाकिस्तान मॅच पळोवपाची क्रिकेट मोगीं मदीं व्हडली क्रेझ आसता. टी-20 वर्ल्ड कपांतल्यो 16 मॅची अमेरिकेंत जातल्यो. तातूंतल्या 9 मॅचींचीं तिकिटी सोपल्यात. 9 जूनाक भारत- पाकिस्ताना मदीं मॅच जातली.
टी-20 वर्ल्ड कपाचो मुख्य कार्यकारी अधिकारी ब्रेट जोन्स हाणे सांगलें की दरेक वर्ल्ड कपांत भारत आनी पाकिस्तानाच्यो मॅची सामक्यो उमळशीक वाडोवपी आसतात. दोनूय देशांचे पंगड अमेरिकेत खेळटना पळोवप म्हणल्यार एक पर्वणी आसतली. भारत आनी पाकिस्तानां मदल्या साखळी फेरयेंतल्यो सगल्यो मॅची अमेरिकेंत जातल्यो आनी थंय रावपी भारतीय आनी पाकिस्तानी ह्या मॅचींक गर्दी करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
