भांगरभूंय | प्रतिनिधी
खबरां संस्था
ऑकलंडः तीन टी-20 मॅचींच्या तिसरे मॅचींत न्युझिलंडाक डकवर्थ लुईस नेमाच्या आदारान 27 धांवड्यांनी हारोवन ऑस्ट्रेलियेन माळेंतल्या तिनून मॅचींत जैत मेळोवन क्लीन स्वीप केला. तिसरे मॅचीं वेळार पावस पडिल्ल्यान 20 ओव्हरींचो खेळ जावपाक शकलो ना.
न्युझिलंडान टॉस जिखून पयलीं बॉलींग करपाचें थारायलें. पावसाक लागून तांणी व्हो निर्णय घेतलो. पावसाक लागून मॅच 15 ओव्हरींची केल्ली पूण ऑस्ट्रेलियेक 10.4 ओव्हरी खेळपाक मेळ्ळयो आनी तांणी 4 आवट 118 धांवड्यो केल्यो.
ऑस्ट्रेलियेच्या ट्रेव्हीस हेडना सगल्यांत चड 30 बॉलांत 5 चौके आनी एका सक्यान 33 धांवड्यो केल्यो. मॅथ्यू शॉटान 11 बॉलांत 3 सके आनी 1 चौक्यान 27 आनी ग्लेन मॅक्सवेलान 9 बॉलांत 3 चौके आनी एका सक्यान 20 धांवड्यो केल्यो. न्युझिलंडा वतीन एडम मिल्ने, बेन स्पियर्स, मिचेल सेंटनर आनी जोश क्लार्कान दरेकी एक विकेट घेतली.
10 ओव्हरींत जैता खातीर 126 धांवड्यो करपा खातीर खेळपाक आयिल्ल्या न्युझिलंडान 10 ओव्हरींत फकत 3 आवट 98 धांवड्यो करपाक शकलो. डकवर्त लुईस नेमा प्रमाण तांकां 27 धांवड्यांनी हार खावची पडली. न्युझिलंडा वतीन ग्लेन फिलिप्सान 24 बॉलांत 5 चौके आनी 2 सक्यांनी नाबाद 40 धांवड्यो केल्यो. शॉट, स्पेंसर जॉनसन आनी एडम जम्पान न्युझिलंडाच्या तीन बॅट्समनांक आवट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
