भांगरभूंय | प्रतिनिधी
4 म्हयन्यां पयलीं टी-20 क्रिकेटीचें वस्तादपण जोडिल्ल्या भारतीय पंगडाचें सध्या हाल-हाल जावपाक लागल्यात. आयर्लेंडा कडल्यान व्हायटवॉश घेतले उपरांत भारतीय पंगडाचेर टिका जाल्ली. तातूंतल्यान मार्ग काडीत इंग्लंडा आड बरें प्रदर्शन करतले अशी समेस्त भारतीयांक आशा आशिल्ली. मात, आतां भारतीय पंगड इंग्लंडा आडूय व्हायटवॉश घेवपाचे वाटेर आसा. टी-20 क्रिकेटीचो संवसारीक वस्ताद जमनीर पावलो. ताची कारणां कितें? ताची विसकटावणी करपी हो नियाळ.
हांगां आमी 2024 टी-20 संवसारीक करंड सर्ती सावन सुरवात करुया. वेस्ट इंडिजेंत जाल्ले हे सर्ती खातीर रोहित शर्मान आपल्याक जाय तसो पंगड वेंचलो. प्रत्येक मॅची खातीर ताचे कडेन रणनिती तयार आशिल्ली. खंयचो खेळगडो खंयचे सुवातेर खेळटलो? कोणाची कितें भुमिका आसतली? राखीव आशिल्ल्या खेळगड्यां मदीं प्लेईंग 11तल्या खेळगड्यांची सुवात घेवपाची तांक आसा काय ना? ह्या सगल्या प्रस्नांची जाप ताणें पंगड वेंचतना दिल्ली. हो पंगड वेंचतना ताणें आयपीएलाचेर आदारीत पंगड वेंचूंक ना, तर अणभवी, तशेंच आक्रमक खेळ करपी असो संगम सादलो. रवींद्र जडेजा सारको संवसारीक पांवड्या वेलो अव्वल अश्टतासी खेळगडो ताणें बॅटींगे खातीर आठव्या सुवातेर दवरलो. वेळ काळ तसो आयलोच जाल्यार फिनिशिंगाक जडेजा आसाच, हें ताचें फाटलें गणीत आशिल्लें.
अक्षर पटेलाक फ्लोटर म्हूण वापरतले, हें स्पश्ट आशिल्लें. जडेजा आनी पटेल दोगांकूय खेळोवपा खातीर ताणें विराट कोहलीक आपल्या वांगडा ओपनर म्हूण खेळोवपाचो मास्टरप्लान आंखलो. यशस्वी जैसवाला सारको अव्वल टी-20 खेळगडो तिसरो ओपनर म्हूण पंगडा वांगडा दवरलो. ऋषभ पंता सारको धूर्त विकेट किपर, हार्दिक पांड्या आनी शिवम दुबे हे आक्रमक बॅट्समॅन, मध्यमगती बॉलरांची जोडी. हुकुमी एक्को बुमरा, 360 डिग्री बॅट्समॅन सुर्यकुमार यादव, अर्शदीप आनी कुलदीप हे विकेट टेकर बॉलर, सगलें गणीत ज्युस्त जुळोवन हाडिल्लें. राखीव विकेट किपर बॅट्समॅन म्हूण संजू सॅमसन, स्पिनर चहल, फास्ट बॉलर सिराजूय आशिल्लेच.
ह्या वर्ल्ड कपांत रोहितसेना चँपियन कशी खेळ्ळी आनी वस्तादपण जोडलें. फायनलींत दक्षीण आफ्रिकेन घाम काडलो, मात तातंतल्यानूय वाट काडली.
ह्या वर्ल्ड कपा पयलीं रोहित शर्मा आनी विराट कोहलीचेर निवृत्तीचो दबाव आशिल्लो. संवसारीक वस्ताद जायना फुडें पयलीं विराट कोहलीन, उपरांत रोहित शर्मान आनी फाटोफाट रवींद्र जडेजान टी-20 क्रिकेटींतल्यान निवृत्ती घेतली. तांच्या निवृत्ती उपरांत अभिषेक शर्मा आनी संजू सॅमसनाक भारतीय टी-20 पंगडांत खेळपा खातीर दार उक्तें जालें. जडेजा गेल्ल्यान अक्षर पटेलाची सुवातूय घटमूट जाली आनी वॉशिंग्टन सुंदराकूय संद मेळ्ळीं. गौतम गंभीराच्या प्रशिक्षणा खाला एक नवी टीम इंडिया आकार घेवपाक लागली. अकस्मात सुर्यकुमार यादवाच्या गळ्यांत कॅप्टनशिपीची माळ पडली. संजू सॅमसनाक संद मेळटनाच ऋषभ पंताक टी-20ची दारां बंद केली. भारतीय पंगड ट्रान्झिशनाच्या पांवड्यार पावलो. 4 व्हड खेळगडे गेले. नव्या खेळगड्यांक संद मेळ्ळीं. तातूंतच मोहम्मद सिराजाकूय विसवाच्या नांवां खाला भायर दवरप जालें आनी 5 नवे खेळगडे, 6 अणभवी खेळगडे अशें समिकरण जालें. मिस्ट्री स्पिनर म्हूण वरुण चक्रवर्ती फुडें आयलो. हो पंगड संवसारीक करंड सर्त लागीं पावसर चँपियन कसो खेळ्ळो. संजू सॅमसनान शेंकड्यांचेर शेंकडे मारले, मात ताचें परस चड तातयांय (शुन्य धांव) घाली. ताका लागून ताची पंगडांतली स्थिती भायर-भितर जाली. संवसारीक करंड लागीं पावलो तसो इशान किशनाक प्रवेश मेळ्ळो. इशानान संद मेळटाच आपली सुवात घट केली. अभिषेक शर्मा भारताचो हुकुमी एक्को आशिल्लो.
संवसारीक करंड सर्त सुरू जाली आनी भारतीय पंगडाचे वाशें घुंवलें. भारतीय पंगड पयल्या मॅची सावन संघर्श करपाक लागलो. ओपनर अभिषेक शर्मा आनी फिनिशर रिंकू सिंग दोगूय फ्लॉप जावपाक लागले. सुर्यकुमारान युएसए आडची मॅच कशी तरी जिखून दिली. उपरांत ताचोय खेळ जायना जालो. इशान किशन, अक्षर पटेल, शिवम दुबे, पांड्यान भारताची आस्त कशी तरी जिवी दवरिल्ली. संजू सॅमसनाक सुरवातीच्या अपेसा उपरांत भायर काडिल्लो. मागीर, उपांत्य फेरयेंत पावपा खातीर वेस्ट इंडिजा आड ‘करो या मरो’ मॅच आयली. वेस्ट इंडीज फूल फॉर्मांत भारत हारयत काय म्हूण प्रस्न? गंभीरान संजूक परत संद दिली. मॅच गेल्यार संजूचेर तलवार, जिखल्यार फुडलें फुडें. हांगां वेस्ट इंडिजेन वेवस्थीत आंखणी करून भारता आड जबरदस्त बॅटींग केली. भारतान जाप दितना संजूच्या जबरदस्त बॅटिंगेच्या नेटार मॅच जिखली. थंय सावन फुडल्यो दोनूय मॅची संजून जिखोवन दिल्यो. अभिषेक शर्मा पुराय सर्तींत बाबत खेळिल्लो, फायनलींत आक्रमक अर्दशेंकडो मारलो. संजू मॅन ऑफ दी सिरीज थारलो, भारतान रडत-रडत संवसारीक वस्तादपण जोडलें. ह्या वस्तादपणांत रोहित शर्माच्या पंगडा सारको ‘चँपियन्स अटिट्यूड’ नाशिल्लो. जिखलें एकदांचें. संवसारीक वस्ताद राखलें, अशी सगल्यांची भावना आशिल्लीं. खरें म्हणल्यार भारता खातीर 4 म्हयन्यां पयलीं मेळिल्लें वस्तादपण हें फ्ल्यूक आशिल्लें. युएसए सारक्या असोसिएट पंगडान भारताक घाम काडिल्लो. सुर्यकुमारा सारको अणभवी खेळगडो निमाणें मेरेन खेळपट्टीर उबो रावलो म्हूण जिखले. सुर्यकुमार, बुमरा आनी पांड्याक कुशीक काडीत जाल्यार आनी संजूचे निमाणें तिनूय डाव वजा केल्यार भारतीय पंगड असोसिएट पंगडा इतलोच बळिश्ट, अशें म्हणूं येता.
आतां भारतीय पंगडान आयर्लेंडा आड टी-20 माळ व्हगडावन हें सिद्ध केलें. इंग्लंडा आड भारत ‘मिसमॅच’ थारलो. श्रेयस अय्यरान चवथें मॅची उपरांत जाल्ले पत्रकार बसकेंत पंगड ट्रान्झिशन फेजींतल्यान वता अशें रजांव दिलें. हांगां ट्रान्झिशन खंय येता? श्रेयस अय्यर अकस्मात भायल्यान भितर येवन कॅप्टन जालो. ताचे खातीर हो पंगड नवो आसा. हेर सगले अणभवीच आसा. संजू 3 मॅची बाबत खेळ्ळे उपरांत भायर जालो. वैभव सुर्यवंशी आयपीएल स्टार म्हूण सिद्ध जालो. अभिषेक शर्माची मर्यादाय उक्तीं जाली. तिलक वर्मा वन डावन खेळटालो. ताका पांचवे-सवे सुवातेर खेळपाक जमना. ताका ताची भुमिका कितें हेंच कळना. सुंदर आनी पटेल काळा भायरे जाल्यात अशी परिस्थिती आसा. पांड्या-बुमरा नासतना हो पंगड जिखपाकूच शकनात, अशी परिस्थिती. इशान किशनाचोय बॅड पॅच सुरू जालां. अशें परिस्थितींत भारताक मॅच जिखयतलो कोण? भारत हारत आसा, ताका जापसालदार कोण?, प्रशिक्षक आनी सपोर्ट स्टाफाची जबाबदारी कितें?
कांय म्हयन्यां पयलीं भारत 4 पंगड खेळोवपाक शकता, अशीं बेंच स्ट्रेंग्थ आसा अशें म्हणटालें. आतां धड एक पंगड उबो जायना, अशी परिस्थिती आसा. प्रयोगाचे गंभीर परिणाम आतां दिसपाक लागल्यात. संवसारीक वस्ताद भारतीय पंगड जमनीर आयला. 6 वर्सांनी भारताचें टी-20तलें अव्वल स्थान वचपाचे वाटेर आसा. हाका जापसालदार कोण? वरिश्ठ खेळगड्यांक कुशीक काडून भुरग्यांक खेळोवपाचो परिणाम कितें तें दिसपाक लागलां. आतां तरी टीम इंडिया (निवड समिती) जागी जायत काय?
अमर पाटील
7507495151
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
