भांगरभूंय | प्रतिनिधी
भांगरभूंय । प्रतिनिधी
मुरगांवः नामनेचे सुटके झुजारी आनी विचारवंत डॉ त्रिस्तांव ब्रागांझा कुन्हा हांची 133 वी जयंती वास्कोच्या टी बी कुन्हा चौकांत मनयली. ह्या वेळार गोंय प्रदेश काँग्रेस समितीचे कॅप्टन विरियातो फर्नांडीस, काँग्रेस अल्पसंख्यांक विभागाचो अध्यक्ष नियाजी शेख, उद्देजक सावियो डिसिल्वा, ओलेन्सियो सिमॉईश, प्रदेश राष्ट्रवादीचो अध्यक्ष जुझे फिलीप डिसोझा, ओरवील दौरादो आनी हेर मानेस्त हाजीर आशिल्ले.
गोंयचे भुंयेंत जायत्या सुटके झुजाऱ्यांनी आपलें बलिदान दिले. कांय सुटके झुजाऱ्यांक पोर्तुगिजानी जायती वर्सा बंदखणीत दवोरून तांका पिडयलें. डॉ कुन्हा हांणी गोंय मुक्ती चळवळींत वांटो घेवन पोर्तुगीज राजवटी आड आवाज उठयलो. गोंय मुक्ती झुजांत तांचो वांटो शिंवाचो आशिल्लो. अशे विरियातो फर्नांडीस हाणी सांगलें.
जुझे फिलीप डिसोझा हांणी आपल्या भाशणात वास्कोंतल्या टी बी कुन्हा चौकाच्या सोबितीकरण करपाची गरज उक्तायली. डॉ कुन्हा हांचे गुण तरणाट्यांनी आपणावचे अशें तांणी सांगलें. काँग्रेस फुडारी आलेंनिस्यो सिमॉईश, नियाजी शेख, सावियो डिसिल्वा हांणी डॉ कुन्हा हाचे विशींचे आपले विचार उक्तायले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
