भांगरभूंय | प्रतिनिधी
येजमान भारत आनी ऑस्ट्रेलिया ह्या पंगडां मदीं णव फेब्रुवारी सावन चार मॅचींची टॅस्ट माळ सुरू जातली. भारता खातीर बॉर्डर-गावस्कर करंड माळ म्हत्वाची आसा. वर्ल्ड टॅस्ट चॅम्पियनशिपीचे फायनलींत पावपाक भारताक ही माळ जिखपाकूच जाय. जर तो दोन वा तीन मॅची जिखता तर तो सहज रितीन फायनलींत पावतलो.
माळेची तयारी करपाक भारत मैदानांत देंवला. ताणें नागपूरांत आपलो अभ्यास सुरू केलो. दिग्गज बॅट्समन विराट कोहली वांगडा चेतेश्वर पुजारा, ओपनर लोकेश राहुल आनी अश्टतासांचो खेळगडो रवींद्र जडेजा हांणी काल बरोच घाम गळयलो.
कोहली खातीर ही माळ सामकी म्हत्वाची आसा. बांगलादेशा आड जाल्ले माळेंत ताका खास अशें प्रदर्शन करपाक जमूंक नाशिल्लें. कोहली सध्या उत्कृश्ट फॉर्मांत आसा. टी-20 आनी वन डे मॅचींनी जबरदस्त खेळी केल्या. ताच्या चाहत्यांक आतां टॅस्टींत व्हड खेळीची आस्त आसा. नोव्हेंबर 2019 सावन ताका टॅस्टींत अजून मेरेन एकूय शेंकडो मारपाक जमूंक ना. शेंकड्यांचो दुकळ हे माळे वरवीं सोंपोवपाक तो इत्सूक आसतलो.
चेतेश्वर पुजारा लेगीत उत्कृश्ट फॉर्मांत आसा. बांगलादेशाचे भोंवडेर ताणें एक शेंकडो मारिल्लो आनी 90 धांवड्यांची खेळी लेगीत केल्ली. ऑस्ट्रेलिये आडचो ताचो रॅकॉर्ड लेगीत जबरदस्त आसा. ऑस्ट्रेलिये आड ताणें 20 मॅचींच्या 37 डावांनी 1893 धांवड्यो केल्यात. ऑस्ट्रेलिये आडची ताची बॅटींग सरासरी 54.08 आसा. हातूंत पांच शेंकड्यांचो आनी 10 अर्द शेंकड्यांचो आस्पाव आसा.
लोकेश राहुला कडल्यान टीम इंडियाक खूब आस्त आसा. फाटल्या कांय काळां सावन ताचें प्रदर्शन सरासरीचें जालां. बांगलादेशा आड ताणें मुखेलपद सांबाळिल्लें. त्या वेळार ताका 22, 23, 10 आनी दोन धांवड्यांची खेळी केल्ली. पुजारा भशेन ताचो लेगीत ऑस्ट्रेलिये आडचो रॅकॉर्ड बरें आसा. ताणें णव टॅस्टींतल्या 16 डावांनी 580 धांवड्यो केल्यात. हातूंत एका शेंकड्याचो आनी स अर्द शेंकड्यांचो आस्पाव आसा.
अश्टतासांचो खेळगडो रवींद्र जडेजा हे माळे वरवीं दुखापतींतल्यान पुर्ण बरो जावन पुनरागमन करतलो. रणजी करंड सर्तींत सौराष्ट्र वतीन खेळून आपूण तंदुरुस्त जाला हें सिद्ध केल्लें. जडेजा आयिल्ल्यान पंगडाक घटसाण मेळटली. तो खतरनाक बॉलिंगे सयत बॅटिंगेंत लेगीत व्हड योगदान दिवपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
