भांगरभूंय | प्रतिनिधी
दोन खेपेचो वस्ताद भारत संवसारीक वन डे सर्त तिसरे खेपे जिखपाक एक पावल पयस आसा. सर्तींत भारतान आपलो शेक दवरला. बॅटींग आनी बॉलींग दोनूय विभागांनी ताणें जबरदस्त प्रदर्शन केलां. आयज हांगाच्या नरेंद्र मोदी स्टेडियमाचेर पांच खेपेचो वस्ताद ऑस्ट्रेलिया आड खेळटलो.
मुखेली रोहित शर्मान अजून मेरेन पंगडाक आक्रमक सुरवात करून दिल्या. ताणें अजून मेरेन 550 धांवड्यो केल्यात. ताचें फुडारपण लेगीत बरें केलां. आपल्या बॉलरांक ताणें योग्य रितीन वापरल्यात. बॅटिंगेंत विराट कोहली (711), शुभमन गिल (346), श्रेयस अय्यर (526) आनी लोकेश राहुल (386) हाणें लेगीत जबरदस्त प्रदर्शन केलां. ह्या सगल्यांनी प्रतिस्पर्धी पंगडांच्या बॉलरांचेर आपलो शेक दवरला.
बॅटिंगे प्रमाण बॉलिंगेंत लेगीत भारतान बरें प्रदर्शन केलां. मोहम्मद शमीन प्रतिस्पर्धी पंगडांच्या बॅट्समनांक घाम काडला. 23 विकेटी घेवन तो सगल्यांत चड विकेटी घेवपाचे वळेरेंत पयले सुवातेर आसा. ताका जसप्रीत बुमरा (18), रवींद्र जडेजा (16), कुलदीप यादव (15) आनी मोहम्मद सिराज (13) हाणें बरें प्रदर्शन केलां.
भारताक अश्टतासांचो खेळगडो हार्दिक पांड्याची गैरहाजेरी जाणावपाक शकता. ताचे गैरहाजेरेंत भारत पांच बॉलरांचो उपेग करता. खंयचो एक बॉलर चड धांवड्यो दिता जाल्यार ताच्यो ओव्हरी घालपाक वा धांवड्यो आडावपाक भारता कडेन बॅकअप प्लॅन ना. तशेंच ऑस्ट्रेलियेचो बॉलिंग विभाग उत्कृश्ट आसा. ताच्या आड भारताक सादूर रावपाची गरज आसा. चेन्नय लीग टप्प्यांतले मॅचींत भारतान ऑस्ट्रेलिये आड बॅटिंग करतना तीन धांवड्यांचेर दोन विकेटी गेल्ल्यो. त्या वेळार लोकेश राहुल आनी विराट कोहली हाणें भारताक संकश्टांतल्यान भायर काडिल्लो. हे खेपे लेगीत भारताक सादूर रावपाची गरज आसा.
फाटल्यो तीन संवसारीक सर्ती येजमान पंगडांनी जिखल्यात. ही परंपरा कायम राखपाचो भारताचो यत्न आसतलो. फाटल्या 10 वर्सां सावन चालू आशिल्लो वस्तादपणाचो दुकळ सोंपोवपाचो यत्न आसतलो.
चेन्नय शारांत भारता आड खेळिल्लो तो हो ऑस्ट्रेलिया पंगड न्हय. त्या वेळार ऑस्ट्रेलिया फॉर्मांत दिसनाशिल्लो. आयज ज्या पंगडा आड भारत खेळटलो, तो फाटल्या आठ मॅचींनी सावन अपराजीत आसा. ताका लागून भारताक सादूर रावपाची गरज आसा.
सुरवातीक भारत आनी दक्षीण आफ्रिका ह्या पंगडां आड हारपी ऑस्ट्रेलियेन उपरांत सेगीत आठ मॅची जिखल्यात. ऑस्ट्रेलिया आठवे खेपे फायनलींत पावला.
सर्तींत सर्वोत्कृश्ट प्रदर्शन करपा फाटलें मुखेल कारण म्हणल्यार ताचे सगले बॅट्समन फॉर्मांत आयल्यात. ट्रॅव्हिस हेड आसु वा मिशेल मार्श (426), डॅव्हिड वॉर्नर (528) वा ग्रॅन मॅक्सवॅल (398), स्टिव स्मिथ वा मार्नस लाबशेन आसुं. सगल्या बॅट्समनांनी योगदान दिलां.
बॉलिंग विभागांत लेग स्पिनर अॅडम झम्पा फॉर्मांत आसा. ताणें 22 विकेटी घेतल्यात. मॅक्सवेल आनी हेड हाणें पार्टटायम बॉलींग बरी घाल्या. तशेंच जोश हेझलवूड, मिचेल स्टार्क आनी मुखेली पॅट कमिन्स हाच्या प्रदर्शनांत बरीच सुदारणां जाल्या.
ऑस्ट्रेलियेन आपलो निमाणो किताब 2015त जिखिल्लो. नॉकआवटांत बरें प्रदर्शन करपाची ताचे कडेन तांक आसा. तशेंच फायनली सारके मॅचींत ताचें प्रदर्शन सदांच उचेंल्या पांवड्या वयलें जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
