भांगरभूंय | प्रतिनिधी
भारताच्या पंगडान इतिहास घडयतना फकत तिसऱ्या दिसा इंग्लंडाक पांचवे मॅचींत एक डाव आनी 64 धांवड्यांनी हारोवन पांच टॅस्टींची माळ 4-1 फरकान जिखली. इंग्लंडाचो पयलो डाव 218चेर सोंपयल्या उपरांत भारतान आपल्या पयल्या डावांत रोहीत शर्मा आनी शुभमन गिल हांच्या शेंकड्यांच्या नेटार 477 धांवड्यो केल्ल्यो. ते उपरांत दुसऱ्या डावांत इंग्लंडाक 195 धांवड्यो करप शक्य जाल्यो. जो रुटान सगल्यांत चड 84 धांवड्यो केल्यो. दुसऱ्या डावांत आर आश्विनान 5, जसप्रीत बुमरा आनी कुलदीप यादव हाणें दरेकी 2 जाल्यार रवींद्र जडेजान एक विकेट मेळयली.
तिसऱ्या दिसाचो खेळ सुरू जावचे पयलीं ही मॅच तिसऱ्या दिसा सोंपतली काय ना हो व्हड प्रस्न आशिल्लो. पूण, पयलें सत्र सोंपल्या उपरांत मॅच दुसऱ्याच सत्रांत सोंपपाची शक्यताय चड वाडिल्ली. इंग्लंडाचो अर्द पंगड जेवणाच्या विसवा मेरेन तंबूंत परतून गेल्लो आनी हें आश्विनाक लागून शक्य जालें.
पयल्या डावांत कुलदीप यादवान इंग्लंडाचो टॉप ऑर्डर गडगडावन उगडयिल्लो, इंग्लंडाच्या दुसऱ्या डावांत कुलदीपाची भुमिका आश्विनान वठयली. इंग्लंडाच्या पयल्या 10 ओव्हरींनी तीन बॅट्समनांक तंबूंत धाडले. ते उपरांत मात रूट आनी जॉनी बॅयरस्टो हांणी डाव सांबाळपाचो यत्न केलो. बॅयरस्टोन आश्विनाक तीन सके मारले. तो आक्रमक बॅटींग करतालो. पूण, कुलदीप यादवाचो भितर येवपी बॉल खेळपाक चुकलो आनी तो बाद जालो.
इंग्लंडाचो मुखेली बेन स्टोक्स आनी रूट हांच्या मुखार व्हड आव्हान आशिल्लें. पूण, स्टोक्स जेवणाचो विसव जावपाक कांय खीण बाकी आसतना आश्वनाच्या बॉलाचेर बाद जालो.
जेवणाच्या विसवा उपरांत लेगीत इंग्लंडा खातीर फायदेशीर अशें कांय घडूंक ना. आश्विनान बेन फोक्साक बाद केलो. आश्विनान टॅस्ट कारकिर्दींत 36वे खेपे एका डावांत पांच विकेटी घेतल्यो. आश्विना खेरीत रोहीत शर्माचे गैरहाजेरेंत फुडारपण करपी जसप्रीत बुमरान इंग्लंडाक धपके दिले. ताणें टॉम हार्टली आनी मार्क वुड हांकां बाद केले.
फाट दुखपाक लागिल्ल्यान रोहीत मैदानांत देंवूंक ना. पूण, बुमरान आपल्या फुडारपणान सगल्यांत प्रभावीत केलो. ताणें आश्विना वरवीं बॉलिंगेची सुरवात केली. आनी ज्या वेळार रूट आनी बॅयरस्टो हांचे मदीं भागिदारी सुरू जाल्ली त्या वेळार कुलदीपाक हाडपाक ताणें वेळ करूंक ना.
इंग्लंडा वतीन फकत रूटान एक बाजू सांबाळून धरिल्ली. ताणें अर्द शेंकडो पुर्ण केलो. भारता आड सगल्यांत चड अर्द शेंकडे मारपी बॅट्समन थारलो. ताचे पयलीं हो विक्रम ऑस्ट्रेलियेचो आदलो बॅट्समन रिकी पॉण्टिंगाच्या नांवार आशिल्लो.
रूटान बशीरा वांगडा मेळून 48 धांवड्यांची भागिदारी करून इंग्लंडाची हार लांबावपाचो यत्न केलो. ही जोडी जडेजान फोडली. ताणें बशीराक एलबीडब्ल्यू बाद केलो. जाल्यार कुलदीपाच्या बॉलाचेर रूट बाद जालो.
अॅण्डरसनाक 700 विकेटी
इंग्लंडाचो फास्ट बॉलर जेम्स अॅण्डरसनान टॅस्ट क्रिकेटींत 700 विकेटी पुर्ण केल्यो. असो पराक्रम करपी तो संवसारांतलो पयलो फास्ट बॉलर थारलो. धर्मशाला टॅस्टींत ताणें कुलदीप यादवाक बाद करून हो वाटचिरो हुपलो. हो पांवडो हुपपाक ताका 187 टॅस्टी आनी 348 डाव लागले. ताच्या फाटल्यान ताच्या पंगडाचो स्टुअर्ट ब्रॉड आसा. ताणें 167 टॅस्टींतल्यान 604 विकेटी घेतल्यात.
वट्ट विक्रमाचो विचार केलो जाल्यार सगल्यांत चड विकेटी घेवपाचे वळेरेंत तो तिसरे सुवातेर आसा. पयले सुवातेर श्रीलंकेचो आदलो ऑफ स्पिनर मुथय्या मुरलीधरन आसा. ताणें 800 विकेटी घेतल्या, दुसरे सुवातेर ऑस्ट्रेलियेचो आदलो सर्गेस्त शेन वॉर्न आसा. लेग स्पिनरान 708 विकेटी घेतल्यात.
41 वर्सां पिरायेच्या अॅण्डरसनान मे 2003त लॉर्ड्स मैदानाचेर झिम्बाब्वे आड टॅस्ट पदार्पण केल्लें. मार्क वर्मुलन ताची पयली विकेट आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
