भांगरभूंय | प्रतिनिधी
पणजी ः ‘टीबी मुक्त गोंय’ करपाचो यत्न भलायकी खातें करता. पंचायती पांवड्यार टीबी दुयेंस ना करपा खातीर पंचायतीचें सहकार्य गरजेचें आसा अशें भलायकी मंत्री विश्वजीत राणे हांणी सांगलें. सोमारा खात्या वतीन आयोजीत केल्ल्या टीबी दुयेंसा पसून मुक्त जाल्ल्या उसगांव आनी शिरोड्यां पंचायतींच्या भोवमान सुवाळ्यांत ते उलयताले. ह्या वेळार अभिनेत्री वर्षा उसगांवकार, तियात्रिस्त जॉन डिसिल्वा, संचालक डॉ. वंदना धुमे, डॉ. रूपा नायक, श्वेता देसाय आनी हेर हाजीर आशिल्ले.
भलायकी खात्यान टीबी मुक्त करपा खातीर जागृताय मोहीम सुरू केल्या अशें राणे हांणी सांगलें. जायते जाण ह्या दुयेंसा कडेन आडनदर करतात. म्हज्या घरांतल्या एका गुरवार बायलेक टीबी जाल्लो. पूण ते कोणाकूच कळ्ळें ना. लक्षणां वाडत गेली तेन्ना सगळ्यांक कळ्ळें. देखूनच टीबीची लक्षणां वेळार वळखून ताचेर वेळार उपचार करप गरजेचें. हे खातीर जागृताय निर्माण करप गरजेचें आसा.
तांणी सांगलें, टीबी दुयेंस मुक्त करपा खातीर आमी रॅपिड टेस्ट, कल्चर टेस्ट, समुपदेशन, उपचार, बरे पोशण दितात. हाचेर ॲड फिल्म तयार केल्या आनी ती आमी सगळेकडेन दाखयतले. ही फिल्म आमी वर्षा उसगांवकार आनी जॉन डिसिल्वा हांकां घेवन तयार केल्यात. ही जागृताय मोहीम येसस्वी जातली आनी गोंय टीबी मुक्त जातले अशी आस्त आसा.
आमी लोकां वांगडा
कार्यावळी उपरांत मंत्री राणे हांणी प्रसार माध्यमां कडेन संवाद सादलो. तांणी म्हणलें, अस्तंत घाटांतल्या संवेदनशील गांवांक वगडावपा संबंदी केंद्रीय मंत्र्याच्या सचीवा कडेन उलयलां. हें विशीं आमी लोकां वांगडा आसात. म्हाका खात्री आसा की मुख्यमंत्री डॉ. प्रमोद सावंत हे प्रकरण योग्य रितीन हाताळून आमकां न्याय दितले.
महाराष्ट्रांत जैत निश्चीत
गोंयचे हेर भाजपाचे कार्यकर्ते महाराष्ट्र विधानसभा वेंचणुके खातीर म्हजे वांगडा काम करतात अशें राणे हांणी सांगलें. थंय भाजपा सरकारान केल्ल्या वावराक पळयल्यार आमचो पक्ष आनी महायुती भोवमतान जिखतले असो आमकां विस्वास आसा अशें राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
