भांगरभूंय | प्रतिनिधी
पणजी : केंद्रीय गुन्यांव तपास (सीबीआय) खात्याच्या पंगडान झुआरीनगरांत धाड घाल्ल्याचें उजवाडाक आयलां. हे धाडींत इंडियन ऑयल कॉर्पोरेशन लिमिटेडच्या तेल सांठवणुकेंतल्यान विमानांत वापरपी एव्हिएशन टर्बाइन इंधनाची (एटीएफ) तस्करी करपी ४ जाणांक धरले.
उजवाडाक आयिल्ले म्हायती प्रमाण, झुआरीनगरांत एटीएफ ह्या पदार्थाची तस्करी करपा विशींची गुप्त म्हायती सीबीआयक मेळ्ळी. ते प्रमाण ते सुवातेर वचून बिरेस्तारा धाड घाली. ह्या वेळार इंडियन ऑइल कॉर्पोरेशन लिमिटेडाच्या तेल साठ्यांतल्यान एटीएफच्या वट्ट ३ हजार लीटर तेलाची तस्करी जाल्ल्याचें मुखार आयलें. ह्या वेळार थंय हजर आशिल्ले मुखेल दुबावीत विठ्ठल चव्हाणा सयत ताच्या तिगां वांगड्यांकूय सीबीआयच्या विशेश पंगडान ताब्यांत घेतले.
जप्त केल्ल्या एव्हिएशन टर्बाइन इंधन (एटीएफ)च्या तेलाची किंमत बाजार भावा प्रमाण सुमार ३ लाख रुपया आसा. तशेंच दुबावितांनी वापरिल्ल्यो दोन गाडयोय जप्त केल्यांत.
मजगतीं, सीबीआयन चवगांचेर भ्रश्टाचार प्रतिबंधक कायदो तशेंच भा.न्या.सं च्या विवीध कलमां खाला गुन्यांव नोंद केला. मेळिल्ले म्हायती प्रमाण, ह्या रॅकेटांत इंडियन ऑयल कॉर्पोरेशन लिमिटेडच्या अधिकार्यांचो आसपाव आसुये ह्या दुबावानूय चवकशी चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
