झिम्बाब्वेक निमाण्या बॉलाचेर जैत

भांगरभूंय | प्रतिनिधी

येजमान झिम्बाब्वे पंगडान टी-20 माळेंतले पयले मॅचींत आयर्लेण्डाक निमाण्या बॉलाचेर एके विकेटीन हारयलो. झिम्बाब्वेच्या जैतांत अश्टतासांचो खेळगडो सिकंदर रझा पर्जळ्ळो. ह्या जैतान ताणें 1-0 अशी आघाडी घेतली.

सिकंदर रझान पयलीं चार ओव्हरींनी 28 धांवड्यो दिवन तीन विकेटी घेतल्यो आनी उपरांत 44 बॉलांनी पांच चवके आनी दोन सक्यांचे मजतीन 65 धांवड्यो केल्यो.

हरारे स्पोर्ट्स क्लबाच्या मैदानाचेर जाल्ले मॅचींत आयर्लेण्डान पयलीं बॅटींग करतना झिम्बाब्वे मुखार 148 धांवड्यांची मोख दवरली. झिम्बाब्वेक निमाणे ओव्हरींत जैता खातीर 9 धांवड्यांची गरज आशिल्ली. ताचो स्कोर 19वे ओव्हरींत 8 बाद 139 असो आशिल्लो. आयर्लेण्डाक जैता खातीर दोन विकेटींची गरज आशिल्ली.

आयर्लेण्डा वतीन निमाणी ओव्हर बॅरी मॅकार्थी करतालो. पयल्या बॉलाचेर ट्रेव्हर ग्वांडून एकूय धांवडी घेवंक ना. दुसऱ्या बॉलाचेर दोन धांवड्यो केल्यो. तिसऱ्या बॉलाचेर तीन धांवड्यो आयल्यो. चवथ्या बॉलाचेर चवको मारलो. पांचव्या बॉलाचेर रिचर्ड नगारवा बाद जालो. अशे तरेन निमाण्या बॉलाचेर जैता खातीर झिम्बाब्वेक दोन धांवड्यांची गरज आशिल्ली. ब्लेसिंग मुजरबानीन निमाण्या बॉलाचेर दोन धांवड्यो करून पंगडाक जैत मेळोवन दिलें.

ते पयलीं 148 धांवड्यांचो फाटलाव करपी झिम्बाब्वेची सुरवात बरी जाली ना. ताची पयली विकेट 15 धांवड्यांचेर पडली. तदिवानाशे मरुमणीन 6 बॉलांक तोंड दितना एक धांवडी केली. दुसरो धपको 21 धांवड्यांचेर बसलो. सीन विलियम्स लेगीत चार धांवड्यो करून तंबूंत परतलो. ओपनर वेस्ले मधेवेरेान 53 धांवड्यांची खेळी केली. मुखेली सिकंदर रझान डाव सांबाळ्ळो. ताणें वेस्ले वांगडा मेळून 26 बॉलांनी 25 धांवड्यो केल्यो. विकेटकीपर बॅट्समन क्लायव्ह मडांडेन 11 बॉलांनी 20 धांवड्यो केल्यो. रझान 42 बॉलांनी 65 धांवड्यो केल्यो. सिकंदर 18.3वे ओव्हरींत बाद जालो. त्या वेळार झिम्बाब्वेचो स्कोर 8 बाद 137 जाल्लो.