भांगरभूंय | प्रतिनिधी
वाळपय, प्रतिनिधी ः गोंयांत वेगवेगळे पद्दतीन शिगमो मनयतात. दरेका गांवची वेगळी परंपरा. वेगळें खाशेलपण. सत्तरींतल्या दरेका गांवांत ५ दीस शिगमो व्हडा उमेदीन मनयतात. परंपरीक चोरोत्सव मनोवपाची परंपरा झर्मे गांवांत खूब वर्सां सावन प्रचलीत आसा. शेंकड्यांनी वर्सां आदीं पूर्वजांनी सुरू केल्ली ही परंपरा आयज लेगीत चालू आसा.
झर्मेचो चोरोत्सव प्रायश्चित म्हणून मनयतात. चोरोत्सव संबंदीं जाणकारांनी दिल्ले म्हायती प्रमाण, शेंकड्यांनी वर्सां आदीं एक कुटूंब काम करुन माणकां, मोतयां घेवन आपल्या गांवांत वतालें. चलता चलतां तांकां रात जाली. देखून ते एक रात ह्या गांवांत रावले. गांवकारांक तांचे कडेन आशिल्ले माणकां, मोतयांची म्हायती मेळ्ळी. इतले व्हड संपत्ती आशिल्लें हें कुटूंब चोर आसपाक शकता. ही चोरिल्ली संपत्ती घेवन तें आपल्या गांवाक वता, असो अदमास ह्या गांवांतल्या गांवकारांनी लायलो. ही गजाल त्या कुटुंबांतल्या लोकांक कळ्ळे बरोबर तांणी बेगोबेग झरम्यां वचून गांवकारांक समजावपाचो यत्न केलो. हें चोर न्हय तर कश्ट करपी कुटुंब आसा अशें सांगपाचो आनी सिद्ध करपाचो यत्न केलो. पूण गांवकार आपली चूक कबूल करपाक तयार जाले नात. हें कुटुंब चोर आनी तांणी ही संपत्ती चोरल्या अशें तांणी सांगलें. तशेंच गांवांतय तांणी चोरी करपाचो यत्न केला हाचो पुरावो दिवपाचो यत्न केलो.
झर्मेचो परंपरीक चोरोत्सव…
मागीर उल्लेख केल्ल्या कुटुंबातल्या दादले- बायलांक मारून उडयले उपरांत तांची तकली वेगळी केली. उल्लेख केल्ले कुटुंब चोर आसा हें सिद्ध करपा खातीर गांवकारांनी तांच्या गळ्यांत नाल्लाची माळ आनी हातांत कोंबड्यो दिल्यो. हे कुटुंब नाल्ल आनी कोंबड्यो चोरपाचे यत्न करताले अशीं कारणां दिवन तांकां चोर थारपाचो यत्न केलो. पूण उपरांत उल्लेख केल्ले कुटुंब हें चोर नासून ते पोट भरपा खातीर हेर गांवांनी काम करताले आनी पयशे आनी मोती घेवन आपल्या घरा परतून वतालें हें कळ्ळें. गांवकारांक खात्रीची म्हायती मेळ्ळे उपरांत दर वर्सा हो चोरोत्सव प्रायश्चित म्हणून मनोवपाची परंपरा चालीक लागली.
झरमे गांवांतलो चोरोत्सव गोंयांत फामाद आसा. वट्ट आठ चोरांक कांय जाणांक तकले पसून आनी कांय जाणांक कमरांतल्यान पुरपाची पारंपारीक पद्दत ह्या गांवांत फामाद आसा. जाका चोरोत्सव म्हणटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
