भांगरभूंय | प्रतिनिधी
पणजी: नामनेची साहित्यीक मीना सुरेश काकोडकार आयज सकाळीं संवसाराक अंतरली. कोंकणीच्या मळार तांचें खूब व्हड योगदान आसा. ह्या योगादाना खातीर तांकां ज्ञानपीठकार रवींद्र केळेकार कोंकणी भाशा पुरस्कारूय फावो जाला. तशेंच तांकां हेर २० पुरस्कारांनी भोवमानीत केल्या. तिणें जायतीं पुस्तकां बरयल्यांत.
मीना काकोडकार हांचे विशीं
२१ सप्टेंबर १९४४ दिसा जल्मल्ली मीना काकोडकार ही कोंकणींतली एक नामनेची लेखिका आनी अनुवादक. तांचे तीन लघुकथा संग्रह, एक निबंद संग्रह, दोन कादंबर्यो आनी तीन बालनाट्यांचीं पुस्तकां उजवाडाक आयल्यांत. ताचे भायर, खास भुरग्यां खातीर तांणी १३ बालकथांचीं पुस्तकां बरयल्यांत.
जाण्टे आनी भुरग्यां खातीर तांचें लेखन कौशल्य सारक्याच प्रमाणांत विस्तारलां. तांच्या कथांचें हिंदी, मराठी, कन्नड, ओडिया, मल्याळम, तमीळ, तेलगू, इंग्लीश, पुर्तुगेज आनी जर्मन ह्या भाशांनी अणकार जाल्यात. ‘वास्तू’ ही तांची गाजिल्ली कादंबरी जाचो कन्नड आनी इंग्लीश भाशेंत अणकार जाला.
कोंकणी साहित्य मळार आपली वेगळी प्रतिमा निर्माण करपी मीना काकोडकार हांकां वट्ट २० पुरस्कारांनी सन्मानीत केल्यात, जातूंत साहित्य आनी अनुवाद ह्या दोगांय खातीर दोन साहित्य अकादमी पुरस्कारांचो आसपाव आसा. तशेंच ‘साळकांतलो जादुगर’ ह्या बालनाट्याक ‘वात्सल्य पुरस्कार’ फावो जाला तसोच ताचो हिंदी भाशेंत अणकार जाला.
गोंय सरकाराच्या लेखा संचालनालयांत जोड-लेखा संचालक पदाचेर काम करतना मीना काकोडकार हांणी कोंकणी भाशेंत एक सर्जनशील लेखिका म्हणून आपली अशी खाशेली वळख निर्माण केली. सेवा निवृत्ती उपरांतूय कोंकणी साहित्याच्या मळार तितलेच सक्रीयतेन सर्जनशील लेखन तिणें केलें.
गोंय कला अकादमीन आयोजीत केल्ले नाटक सर्तींनी तिणें वांटो घेवन कितलीशींच इनामां मेळयल्यांत. कला अकादमीन खास रंग सन्मान पुरस्कार भेटोवन तांकां सन्मानीत केल्यात. कोंकणी भाशा मंडळाचो पुरस्कार, सर्गेस्त नरसिंह दामोदर नायक पुरस्कार, कुळागर पुरस्कार, साहित्य अकादेमी पुरस्कार, यशोदामिनी पुरस्कार, गोंय राज्य पुरस्कार, अशे कितलेशेच प्रतिश्ठीत पुरस्कार तांकां फावो जाल्यात.
कोंकणी साहित्याच्या मळार तिणें दिल्लें हें योगदान सदांच याद उरपा सारकें. तांची निमाणी यात्रा आयज दनपारच्या १२ वरांचेर घोगळ – मडगांवच्यान भायर सरतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
