भांगरभूंय | प्रतिनिधी
डिसेंबराच्या निमण्या सप्तकांत उत्तराखंडांतल्या जोशीमठ शाराचो काय भाग नेटान खचूंक लागला, अशें इस्रोच्या उपग्रहांनी घेतिल्ल्या फोटवां वयल्यान उक्ताडार आयलां. फकत 12 दिसांत तो वाठार 5.4 सेंमी मुंगरला. 27 डिसेंबर ते 8 जानेवारी हो तो काळ. हाचें आदींय एप्रिल ते नोव्हेंबर 2022 ह्या काळांत जोशीमठ 9 सेंमी मुंगरिल्लें. मात हे खेपे तें नेटान जमनींत गेलां, अशें इस्रोच्या नॅशनल रिमोट सेन्सिंग सेंटरान सांगलां.
बाधित वाठारांतलीं हॉटेल मोडपाचे काम बंद केलां.
पावस आनी बर्फ पडपाक सुरवात जाल्या. पुलिसांनी भोंवतणचे रस्ते बंद केल्यात. एक हॉटेल पुरायपणान फाटीं सरकलां. माउंट व्ह्यू हॉटेल लेगीत मोडटले.
फाटले 15 दीस
27 डिसेंबर – जोशीमठाच्या घरांक वेरो वतकच लोकांनी आंदोलनाची शिटकावणी दिली. उपरांत प्रशासनान अभियंते आनी अधिकाऱ्यांच्या 5 वांगड्यांच्या पंगडा वरवीं तपासणी केली. घरांच्यो वेरो वाडत गेल्यो. परिस्थिती इबाडली तेन्ना राज्य आनी केंद्र सरकारान दखल घेतली.
6 जानेवारी – सुमार 500 घरां आनी इमारतींचें लुकसाण जाल्ल्यान भंय वाडलो. लोकांक सुरक्षीत सुवातेर व्हेले.
7 जानेवारी – उत्तराखंडाचे मुख्यमंत्री पुष्कर धामी जोशीमठांक पावले. तांणी परिस्थितीचो नियाळ घेतलो. मजगतीं, ही समस्या फकत कांय वाठारांनीच आसा, अशें चमोलीचे डीएम हिमांशू खुराना हांणी सांगलें. लुकसाण जाल्ल्या लोकांक शक्य तितली मजत करपाची सुचोवणी मुख्यमंत्र्यान केली.
8 जानेवारी – प्रधानमंत्री कार्यालयान जोशीमठाचे परिस्थिती संबंदी उच्च पांवड्यावेली बसका घेतली. जिल्हो प्रशासना कडल्यान नागरिकांक बेगोबेग सुरक्षीत सुवातेर वचपाक सांगलां. प्रधानमंत्री मोदी हांणी मुख्यमंत्री धामी हांचे कडेन चर्चा केली.
9 जानेवारी – जोशीमठांतल्या इमारतींचे लुकसाणीचे नियाळ घेवपाक सांजवेळार केंद्राचो एक पंगड आयलो. तांणी अहवाल राज्य सरकाराक सादर केला. 478 घरां आनी 2 हॉटेलां धोक्याच्या वाठारांत आसा, अशें जाहीर केलें. उत्तराखंड सरकारान जोशीमठांची तीन विभागांत विभागणी करपाचें थारायलें. 9 जानेवारी मेरेन 81 कुटुंबां स्थलांतरीत जालीं.
10 जानेवारी – थळाव्या लोकांनी केल्ल्या निशेधा उपरांत जोशीमठांतली दोन हॉटेलां मोडपाचें काम बंद केले. आमकां कसलीच नोटीस दिवंक ना अशें हॉटेल धनयांनी सांगलें. लुकसाण भरपायेचीय मागणी केली. सर्वोच्च न्यायालयान रोखडीच ह्या प्रकरणाचेर सुनावणी घेवपाक न्हयकार दिलो.
11 जानेवारी – 723 घरांनी वेरो दिसल्यो. धामीन जोशीमठांत बळी पडपी लोकांक मेळून देड लाख रुपया मजतीची घोशणा केली. तांकां दुसरे कडेन व्हरपाक 50 हजार रुपया आनी लुकसाण भरपाय एक लाख रुपया आगाऊ दितले, अशेंय सांगलें. निमाणे भरपायेची रक्कम फुडें थारायतलें.
12 जानेवारी – आनीक 50 परस चड घरां वेरेलीं. भरपाय थारायनासतना आमी आमची मालमत्ता कशी दितले, अशें लोकांनी सांगलें. अधिकाऱ्यांची बसका. सांजवेळा मेरेन बाधितांच्या खात्यांत देड लाख रुपया पावतले अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
