भांगरभूंय | प्रतिनिधी
भारत आनी न्युझिलॅण्ड ह्या पंगडां मदीं आयज संवसारीक वन डे क्रिकेट सर्तींतली पयली सेमी फायनल हांगाच्या वानखेडे स्टेडियमाचेर जातली. दोनूय पंगडांची नदर फायनलींत सुवात मेळोवपाचेर आसतली. चार वर्सां पयलीं न्युझिलॅण्डान भारताक हारोवन फायनलींत सुवात मेळयिल्ली. हाची पुनरावृत्ती करपाचो ताचो यत्न आसतलो, जाल्यार दुसरे वटेन भारत हारीचो बदलो घेवपाक इत्सूक आसतलो.
रोहित शर्माच्या फुडारपणखाला खेळपी भारतान सर्तींत अजून मेरेन उत्कृश्ट प्रदर्शन केलां. ताणें लीग टप्प्यांतल्यो सगल्यो म्हणल्यार णवाच्यो णवूय मॅची जिखून गुणतकट्यांतली पयली सुवात मेळयिल्ली. ताचे बॅट्समन खास करून विराट कोहली (594), मुखेली रोहित शर्मा (503), श्रेयस अय्यर (421) आनी लोकेश राहुल (347) फॉर्मांत आसात. बॅटींग विभागा भशेन बॉलींग विभागान लेगीत जबरदस्त प्रदर्शन केलां. जसप्रीत बुमरान 17, मोहम्मद शमीन 16, रवींद्र जडेजान 16, कुलदीप यादवान 14 आनी मोहम्मद सिराजान 12 विकेटी घेतल्यात. पूण, भारताचीं कांय दुबळेंपणां लेगीत आसात. रोहित शर्मान आक्रमक सुरवात केल्या खरी, पूण ताचो वांगडी शुभमन गिलाक सातत्यान बरें प्रदर्शन करपाक जमूंक ना. कोहली भारता वतीन सगल्यांत चड धांवड्यो करपी बॅट्समन. ताचे खेरीत राहुल आनी श्रेयस हाणें लेगीत बरें प्रदर्शन केलां. पूण, ते उपरांत गजाली मात्श्यो कठीण जातात. रवींद्र जडेजान कुडक्या कुडक्यांनी बरें प्रदर्शन केलां. सुर्यकुमार यादवाक सातत्यान बरें प्रदर्शन करपाक जमूंक ना. पूण, ताणें म्हत्वाचे मॅचींत एक अर्द शेंकडो मारला.
अश्टतासांचो खेळगडो हार्दिक पांड्याची गैर हाजेरी पंगडाक जाणावपाक शकता. पंगडान अजून मेरेन बरें प्रदर्शन केलां. पूण, मदले फळयेंतली बॅटींग अजून हुस्क्याचो विशय आसा.
किताब जिखपाचें चेपण लेगीत पंगडाचेर आसा. मॅची खेळपाक भारताच्या वेगळ्यावेगळ्या वाठारांनी भोंवडी केल्ल्यान खेळगडे मात्शे थकल्यात लेगीत.
दुसरी गजाल म्हणल्यार आयसीसीच्या नॉकआवट मॅचींनी न्युझिलॅण्डा आड हार भारता खातीर मोठी भिरांत आसा. 2003 उपरांत भारतान पयले खेपे धर्मशालांत जाल्ले लीग टप्प्या वयले मॅचींत न्युझिलॅण्डाक हारोवपाक भारताक येस आयिल्लें.
दुसरे वटेन सेगीत पांच आयसीसी सर्तींचे सेमी फायनलींत सुवात मेळोवपी न्युझिलॅण्डाक वस्तादपण जोडपाक जमूंक ना. न्युझिलॅण्डान संवसारीक सर्तींत जबरदस्त प्रदर्शन केलां. ताणें 13तल्या 9 सर्तींचे सेमी फायनलींत खेळ्ळा. ताचो ओपनर रचीन रवींद्रान धांवड्यांचो पावस घाला. ताणें 70.62चे सरासरीन 565 धांवड्यो केल्यात. डॅरिल मिशेल मदले फळयेंत घटसाण हाडटा. ताणें 418 धांवड्यो केल्यात. जाल्यार ओपनर डॅव्हॉन कोन्वे ल्हवल्हव फॉर्मांत आयला. ताणें अजून मेरेन 359 धांवड्यो केल्यात.
स्पिनर मिशेल सॅण्टनरान उत्कृश्ट बॉलींग घाल्या. ताणें 16 विकेटी घेतल्यात. ट्रॅण्ट बोल्टान 13 विकेटी घेतल्यात. टीम सावथी पुर्ण तंदुरुस्त जाला. ताका लागून बॉलिंग विभागांत घटसाण आयल्या. पूण, मॅट हॅन्रीची गैर हाजेरी न्युझिलॅण्डाक जाणावपाक शकता.
हॅन्रीचे दुखापती उपरांत पंगड असंतुलीत जाला. न्युझिलॅण्डाक योग्य पांचव्या बॉलराचो उणाव जाला. मुखेली केन विलियम्सन लेगीत तंदुरुस्ती खातीर संघर्श करतना दिसता. बॅटिंगेंत लेगीत मात्सो हुस्को आसा. रचीन, मिशेल आनी कॉन्वे हांचे खेरीत हेर एकाय बॅट्समनान म्हणपा सारकें योगदान दिवंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
