भांगरभूंय | प्रतिनिधी
इंडीयन प्रिमीयर लिगेंत (आयपीएल) आयज येजमान राजस्थान रॉयल्स आनी दिल्ली कॅपिटल्स ह्या पंगडां मदीं मॅच जातली. दिल्ली कॅपिटल्साक आपले पयले मॅचींत पंजाब किंग्सा कडल्यान हार घेवची पडिल्ली, जाल्यार राजस्थान रॉयल्साक पयले मॅचींत लखनौ सुपर जायण्ट्सा आड 20 धांवड्यांनी जैत फावो जाल्लें. घरच्या मैदानाचेर खेळटना जैताची लय कायम राखपाचो ताचो यत्न आसतलो. जाल्यार दिल्ली कॅपिटल्स अंदूंच्या हंगामांतलें पयलें जैत सोडपाक इत्सूक आसतलो.
दोनूय पंगडां मदीं अजून मेरेन 27 मॅची जाल्यात. हातूंतल्यो राजस्थान रॉयल्सान 14 जाल्यार दिल्ली कॅपिटल्सान 13 मॅची जिखल्यात. म्हणल्यार मॅच बरोबरीची आसा. पूण, ह्या सवाई मानसिंग स्टेडियमाचेर राजस्थानाचें दालें जड आसा. ताणें चार मॅची जिखल्यात, जाल्यार दोन मॅचींनी हार घेतल्या.
पयले मॅचींत राजस्थानाचो मुखेली संजू सॅमसनान 52 बॉलांनी नाबाद 82 धांवड्यांची खेळी करून आपलो दिश्टीकोण स्पश्ट केला. संवसारीक टी-20 सर्ती खातीर विकेटकीपर बॅट्समनाचो तोच मुखेल दावेदार आसा. एक मुखेली म्हणून ताचो रॅकॉर्ड आनीक चड बरो आसा. मुखेलीच्या रुपान ताची बॅटींग स्ट्रायक रेट 145 इतकी आसा. आयपीएलाच्या इतिहासांत वीरेंद्र सेहवागा (168) उपरांत दुसरी सर्वोकृश्ट आसा.
दुखापती उपरांत अनरिख नॉर्खिए दिल्ली कॅपिटल्सांत पुनरागमन करपाची तयारी करता. पूण, ताणें 2020त जे तरेचें प्रदर्शन केल्लें तशें 2022 आनी 2023त कायम राखपाक ताका जमूंक नाशिल्लें. 2020त ताणें 16 मॅचींनी 22 विकेटी घेतिल्ल्यो. 2021त ताणें फकत 6.16 इकॉनॉमीन धांवड्यो दिवन 12 विकेटी घेतिल्ल्यो. 2022 आनी 2023त हो आंकडो घसरून वळेरेन स मॅचींनी 9 विकेटी आनी 10 मॅचींनी 10 विकेटी असो जालो. नॉर्खिए आतां फकत पुनरागमनूच न्हय जाल्यार फॉर्मांत लेगीत येवचो अशी आस्त दिल्ली कॅपिटल्स बाळगून आसतलो.
ट्रॅण्ट बोल्ड उदका भशेन शांत दिसता. पूण, पावरप्लेंत ताची बॉलींग घातक थारता. लखनौ आड ताणें दोन विकेटी घेतिल्ल्यो. राजस्थानान चडशे खेपे ताचो पावर प्लेंत उपेग केला. 2022त ताणें 22 विकेटी घेतिल्ल्यो. राजस्थानाच्या बॉलरांनी फाटल्या दोन वर्सांनी पावरप्लेंत 31 विकेटी घेतल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
