भांगरभूंय | प्रतिनिधी
अजून 28 टक्के उणाव, आयज ऑरेंज अॅलर्ट, लोकजीण विस्कळीत
भांगरभूंय । प्रतिनिधी
पणजी : गोंयांत मॉन्सून 11 तारखेक पाविल्लो, पूण उपरांत गायब जाल्लो. म्हयनो सोंपपाक पावसान नेटाची हाजेरी लायिल्ल्यान म्हयन्यांतली तूट खूब प्रमाणांत भरून आयल्या. म्हयन्याच्या निमाण्यां 8 दिसांत जूनांतलो 70 टक्के पावस पडला. सरासरीचे तुळेंत जूनांतलो पावस 28 टक्के उणो आसा.
जुलयाच्या पयल्या सप्तकांत लेगीत पावसाची रीपरीप चालूच उरतली, असो अदमास आसा. हवामान खात्यान आयज ऑरेंज अॅलर्ट जारी केला. 4 जुलय मेरेन येलो अॅलर्ट आसतलो. पावसाक लागून रस्ते खणपा सयत झाडां पडपाचें प्रकार चालूच आसात. हाका लागून लोकजीण विस्कळीत जाल्या, पूण शेतकार भाव मात सुखावला. धरणांतल्या उदकाचें प्रमाण वाडिल्ल्यान पियेवपाच्या उदकाचो उणाव खूबशा प्रमाणांत पयस जाला. म्हापश्यां चार रस्त्या कडल्या सर्वीस रोडाचेर फोंडकुलां पडपाक सुरवात जाल्या. पेडणें- मालपेंच्या सर्वीस रस्त्याचेर शेकरो आनी माती व्हांवून आयल्या.
फाटल्या 24 वरांत गोंयांत सरासरी 89.3 मिमि पावसाची नोंद जाल्या. आतां मेरेन 655 मिमि (25.78 इंच) पावसाची नोंद जाल्या. हो पावस 28.3 टक्के उणो आसा. जूनांत सरासरी 914 मिमि (35.98 इंच) पावस पडटा. हवामान खात्या कडेन नोंद जाल्ले प्रमाण 23 ते 30 जून ह्या 8 दिसांत 444.7 मिमि पावस पडला. हें प्रमाण 70 टक्के जाता. एखादो फलंदाज सुरवेक सावकास खेळटा. मात स्लॉग ओवरींनी नेटान फलंदाजी करून तो खूब धांवड्यो काडटा. अंदूंच्या पावसाची लेगीत अशीच गत आसा. सरासरीचो विचार केलो जाल्यार 28 जूनाक सगळ्यांत चड म्हणल्यार 142.5 मिमि (5.61 इंच) पावसाची नोंद जाल्या.
शुक्रारचो विचार केलो जाल्यार पणजे सकाळीं 8.30 ते सांजे 5.30 मेरेन 2.4 मिमि पावसाची नोंद जाल्या. पणजे परस म्हापशें, पेडणें, काणकोण, सांगें ह्या वाठारांनी चड पावस पडला. सकाळ ते सांजे मेरेन पणजी सोडून हेर वाठारांतल्या पावसाच्यो नोंदी उपलब्ध जावंक ना. दुसऱ्या दिसा 24 वरांतल्या पावसाचें प्रमाण मात उपलब्ध जाता. पणजे चडांत चड तापमान 27.7 अंश जाल्यार मुरगांवांतलें चडांत चड तापमान 28 अंश आशिल्लें. पावसाक लागून तापमान देंवून गरमीचें प्रमाण उणें जालां. जुलयाच्या पयल्या सप्तकांत आनी दुसऱ्या सप्तकांत पावसाचें प्रमाण चड आसतलें, असो अदमास हवामान खात्यान उक्तायला.
म्हापश्यां, मुरगांवां सगळ्यांत चड पावस
फाटल्या 24 वरांत म्हापश्यां सगळ्यांत चड म्हणल्यार 147.3 मिमि (5.79 इंच) पावसाची नोंद जाल्या. म्हापश्यां उपरांत मुरगांवां 141.8 मिमि जाल्यार पणजे 118.6 मिमि पावसाची नोंद जाल्या. दाबोळी 141 मिमि पावस नोंद जाला. पणजे रातीक चड पावस पडलो. शुक्रारा सकाळीं मात पावसाचें प्रमाण उणें जालें.
फाटल्या 24 वरांतलो पावस मिमिंत
म्हापशें 147.3
पेडणें 80.8
फोंडें 95.4
पणजी 118.6
पोरणें गोंय 99.0
सांखळी 84.2
वाळपय 67.5
काणकोण 52.4
दाबोळी 141.0
मडगांव 60.1
मुरगांव 141.8
केपें 20.0
सांगें 41.1
15 दिसांत पडलीं 317 झाडां
फाटल्या 15 दिसांत 317 झाडां पडपाच्यो घडणुको उजो पालोवपी दळा कडेन नोंद जाल्यात. तातूंतलीं सुमार 51 झाडां घरांचेर पडिल्ल्यान घरांचें व्हड लुकसाण जालें. उजो पालोवपी दळान दिल्ले म्हायती प्रमाण ह्या काळांत 26.41 लाखांचें लुकसाण जालें. कांय झाडां घरांचेर पडलीं वा शेडीचेर पडलीं. 155 झाडां रस्त्याचेर पडलीं, 57 झाडां वीज सरयांचेर, ट्रान्सफोर्मर वा हेर वीज पुरवण करपी यंत्रणांचेर पडिल्ल्यान वीज पुरवण खंडीत जाली, 12 झाडां दुचाकी तशेंच चारचाकींचेर पडलीं. जाल्यार 42 झाडां कंपावंड, शेड वा हेर बांदकामांचेर पडिल्ल्याची म्हायती उजो पालोवपी दलान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
