भांगरभूंय | प्रतिनिधी
भांगरभूंय । प्रतिनिधी
शिवोलीः गोंय दर्या देग विभाग वेवस्थापन प्राधिकरणान (जीसीझेडएमए) कांदोळींतल्या ड्रॉपलेट ह्या क्लबाचेर वेगवेगळ्या नेमांच्या उल्लंघना खातीर बंदीची कारवाच केल्या. रेवेंची तेंबा सपाट करून बांदकाम केल्ल्याचो आरोप क्लबाचेर आसा. जीसीझेडएमएन बार्देशाचो उपजिल्होधिकारी आनी उपविभागीय अधिकाऱ्यांक क्लब सील करपाची सूचोवणी केल्या.
क्लबाक दिल्लें उदकाचे कनेक्शन बांदकाम खात्याक आनी लायटीचें कनेक्शन तोडपाक वीज खात्याक सांगलां. जीसीझेडएमएन क्लबाक काम बंद करपाचो आदेश दिल्लो मात तांणी ताचे कडेन आडनदर करून जीसीझेडएमएचो अवमान केलो. आमी क्लबाचेर पर्यावरण राखण कायद्या खाला क्लबाचेर कारवाय करून मालमत्ता सील करपाचो आदेश दिला अशें जीसीझेडएमएचो वांगडी सचीव जॉन्सन फर्नांडीस हांणी सांगलें.
ह्या क्लबा आड कळंगूटे मतदारसंघ फोरमान मुंबय उच्च न्यायालयाच्या गोंय खंडपिठांत याचिका सादर केल्ली. तात्पुरतो शॅक उबारपाक खातीर ना हरकत दाखलो घेवन कायम स्वरुपी बांदकाम केल्ल्याची फोरमाची कागाळ आशिल्ली. जीसीझेडएमएन उपरांत ड्रॉपलेट क्लबाची तपासणी करून क्लब धनयांत जायत्या नेमांचें उल्लंघन केल्ल्याचें सामकार हाडल्लें. जीसीझेडएमएचो वांगडी सचीव जॉन्सन फर्नांडीस आनी तीन अधिकाऱ्यांनी ही तपासणी केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
