भांगरभूंय | प्रतिनिधी
बाणावले विशेश ग्रामसभेंत नागरिकांचो थारावमडगांव: बाणावले गोंय पर्यटन विकास म्हामंडळाचे सुवातेंत तीन नखेत्री हॉटेल आनी पार्कींग प्रकल्पा खातीर साळगांवकार कॉर्पोरेशन प्रा. लि.क दिवन सुवातेचो विकास करतले. ह्या प्रकल्पाक बाणावलेचे विशेश ग्रमासभेंत नागरिकांनी विरोध केलो. ते विशींचो सगल्यांचे संमतीन थारावूय संमंत केलो.
बाणावले गोंय पर्यटन विकास म्हामंडळाची सुवात तीन नखेत्री हॉटेल वा ताचे परस चड हॉटेलां उबारप, चलोवप आनी देखरेख करपा सयत पार्कींग प्रकल्प उबारपा खातीर साळगांवकार कॉर्पोरेशन प्रा. लि.क दितले. हे विशींची चर्चा करपा खातीर बाणावली पंचायतीन विशेश ग्रामसभेचें आयोजन बिरेस्तारा सांजवेळा केल्लें.
हे ग्रामसभेंत नागरिकांनी सरकाराचे हे कृतीचेर आक्षेप घेतला. राज्य सरकार नागरिकांच्यो, शेतकारांच्यो सुवातो उण्या मोलान विकत्यो घेता, आनी थंय लोकांचे जिणेमान सुदारतलें, उंचावतलें असो प्रकल्प हाडपा बदला ती सुवात खाजगी उरदगतीक दिवन थळाव्यांची फाटवणूक करता. हो विकास न्हय जाल्यार रिअल इस्टेट घोटाळो आसा. सरकारान पर्यटना कडेन संबंदीत अशा प्रकल्पाचे निर्मिती करपा बदला विकासाच्या फायद्याचो निर्णय घेवचो न्हय. जंय पार्कींग प्रकल्प उबारपाचो प्रस्ताव आतां ग्रामसभेंत आयला, ती सुवात कारदात्यांच्या पयशांतल्यान विकसीत केल्ली आसून तीन वर्सां लेगीत जाली नात. ते खातीर ती सुवात सर्वसामान्य लोकांच्या वापरा खातीर गोंय पर्यटन विकास प्राधिकरणा कडेनूच उरपाची गरज उक्तायली.
ज्या बोलिदारान विकासा खातीर सुवात घेतल्या, तांचेच हॉटेल हे सुवातेच्या शेजरा कार्यरत आसा. थंय पर्यटकांक पे पार्कींग केल्यार पर्यटकांचे संख्येंत उणाव जावंक शकता. ताका लागून शॅक्स ऑपरेटर, वॉटरस्पोर्टस आनी टॅक्सीकारांच्या वेवसायाचेर अन्याय जावंक शकता. पे पार्कींग टाळपा खातीर गाडयो मुखेल रस्त्या शेजरा पार्क केल्यार येरादारीची कोंयडी जावंक शकता. खाजगी संस्था आनी विकासक फायद्या खातीर गुंतवणूक करतात आनी परंपरीक वेवसाय घाताक येत आशिल्ल्याचें मत नागरिकांनी मांडलें.
ताका लागून ही सुवात भाडें तत्वाचेर खाजगी संस्थांक वा विकासा खातीर दिवची न्हय. एक समिती स्थापन करून आमदार, पर्यटन मंत्री, मुख्यमंत्री आनी हेर लोकप्रतिनिधींची भेट घेवन लोकांच्यो भावना मांडच्यो अशी मागणी ग्रामसभेंत केली. लोकांचे मागणे प्रमाण थळाव्या विकासाक गोंय पर्यटन विकास म्हाडंळाची सुवात दिवची न्हय असो थाराव घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
