भांगरभूंय | प्रतिनिधी
भांगरभूंय प्रतिनिधी
पणजीः गोंय वैजकी महाविद्यालयांत उपचार घेवपी दुयेंतींचीं म्हायती डिजीटायज करपाची प्रक्रिया गोंय म्हायती तंत्रगिन्यान म्हामंडळान सुरू केला. पूण जीएमसी सयत हेर सामुहीक भलायकी केंद्रात उपचार घेवपी दुयेंतींचीं म्हायती डिजीटायज करपाचे हावेस म्हामंडळान उक्तायल्लो. पूण जीएमसी हे विशीं फाटीं फुडें जाता. जर ही म्हायती डिजीटायज जायत जाल्यार दुयेंतींक पेपर करपाची गरज पडचीं ना, अशें म्हामंडळाचे अध्यक्ष डॉ. चंद्रकांत शेट्ये हांणी सांगलें.
जीएमसींत परत उपचार घेवंक वतना पयलींचो पेपर घेवन वच्चो पडटा. त्या पेपराचेर पयलीं कसले दुयेंस आसले आनी ते खातीर कसली वखदां चलताली हाची म्हायती आसताली. पूण बेगीनूच हो पेपर काळा भायरो जातलो. जीएमसींत एडमीट जावपी दरेक दुयेतींची म्हायती डिजीटायज जातली. ही सगळी म्हायती एकठांय करून ती डेटा रुपांत दवरपाचें काम म्हायती आनी तंत्रगिन्यान खातें करता. दुयेतींक एक आयडी दितले आनी तो घाले उपरांत दुयेती विशीं सगळी म्हायती मेळटली.
आमी जीएमसींचो डेटा एकठांय करपाक सुरवात केल्या. जीएमसी सयत हेर सामुहीक भलायकी केंद्रांचो डेटा घेवन जीएमसींक धाडपाचेंय आमी थारयिल्ले. पूण जीएमसी म्हणटा हे भलायकी केंद्राचो डेटा एकठांय करपाचें काम आमी करतात, देखून हे विशींची फायल आडखळ्ळ्या, अशें डॉ. शेट्ये हांणी सांगले.
भलायकी केद्रांतल्यान पेशंट जीएमसींत वचत जाल्यार ताचे दुयेंसा विशीं सगळी म्हायती आयडी नंबर घालो काय मेळटली. भलायकी केंद्रात तांका कसले दुयेंस आसलें हें सांगपा खातीर तांकां पेपर करपाची गरज ना. हे विशींचो डेटा स्टोर जातलो आनी दुयेसांचो सगळो इतिहास रोखडोच मेळटलो, अशी म्हायती डॉ. शेट्ये हांणी दिली.
जीएमसींत जे दुयेती आसात तांचो सगळो डेटा आसा. पूण भलायकी केंद्रात वचपी दुयेतींक वर्स पयलीं कसलें दुयेस आशिल्ले हाची नोंद नासता देखून सद्याच्या दुयेसांक तो परस्पर संबंद लागप कठीण जावन रावता. ही प्रक्रिया सुरळीत जावची म्हूण आमचो हेत आशिल्लो, अशे डॉ. शेट्ये हांणी म्हणलें.
जर सगळ्या दुयेतींचो डेटा आसत जाल्यार पदव्युत्तर शिक्षण घेवपी भुरगे आसात तांका आपले थिसिज तशेंच संशोधन करपाक मजत जातली. आता आमच्या कडेन फक्त जीएमसींचो डेटा आसा. जर पुराय गोंयचो डेटा आसत जाल्यार स्पश्ट आंकडेवारी मेळून हे विशीं खोलायेन खूब अभ्यास करपाक येता, अशें डाॅ शेट्ये हांणी सांगलें.
दोनापावला रिते आशिल्ले आयटी हॅबीटाटचे प्लॉट भरपा खातीर सल्लागार म्हामंडळ नेमला. हे प्लॉटांचे वाटप करपा खातीर म्हामंडळ निविदा काडून फुडलो निर्णय घेतले. फक्त आयटी कंपनी आसात जांकां आपली आयटी सुविधा हांगासर उबारपाक जाय तांकांच आमी प्लॉट दिवपाचेर ठाम आसात. ही सगळी प्रक्रिया पारदर्शक जावची म्हूण आमी सल्लागार नेमला, अशें डॉ. शेट्ये हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
