भांगरभूंय | प्रतिनिधी
मडगांव, प्रतिनिधी : दाबोळी विमानतळार विमान सेवा उणी करुन हो विमानतळ बंद करपाचो विचार आसा. मोपा विमानतळ लुकसाणांत चल्ला. ताका लागून मोपा विमानतळाक, जीएमआर कंपनीक फायदो करून दिवपाक दाबोळी विमानतळ बंद करपाक सोदता, असा दावो गोवन्स फाॅर दाबोळी ओन्लीचे संयोजक फादर इरेमितो रिबेलो हांणी केलो.
मडगांवां पत्रकार परिशद घेवन गोवन्स फाॅर दाबोळी ओन्ली वतीन मोपा विमानतळाचो फायदो जावपा खातीर दाबोळी ल्हव ल्हव बंद करपाचें प्लॅनींग चालू आसा, अशें फा. रिबेलो हांणी सांगलें. दाबोळेच्या विमानांचें भाडें मोपा विमानतळा परस चड दवरलां. विमान कंपन्यो दाबोळेच्यान सेवा दितना गिरायकांचे चड पयशे घेतात, तशेंच हेर सेवां खातीरूय चड पयशे दिवचे पडटात. ताका लागून विमान कंपन्यो मोपा कडेन वळटात अशें तांणी सांगलें.
मंत्री मावीन गुदिन्हो हांणी, जीएमआर सरकाराचेर चेंपण हाडटा, अशें म्हणलां. ताका लागून सरकार आपलो विस्वास होगडायता. दाबोळी विमानतळ वेवस्थापक आनी मुख्यमंत्र्यांनी हे विशीं जाप दिवपाची गरज आसा. पर्यटनाचे नदरेन दक्षीण गोंयांक फायद्याचे थारिल्ल्या दाबोळी विमानतळाचो फुडार कितें आसतलो? हाची म्हायती राज्य सरकारान दिवची. लोकसभा वेंचणुको बेगीनूच जावपाच्यो आसात. ताका लागून लोकांनी उमेदवारांक दाबोळी विमानतळ बंद कोण करपाक सोदता? असो प्रस्न करप गरजेचें. सध्याचें सत्ताधारी सरकार गिरेस्तांचें, सामान्य लोकांचें न्हय. ताका लागून विचार करून मतदान करचें. अशें फा. रिबेलो हांणी सांगलें. दाबोळी विमानतळाच्या वेवस्थापक आनी संचालकांक विमानतळ सुरु दवरपा विशीं निवेदन सादर करतले, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
