भांगरभूंय | प्रतिनिधी
25 कंपनीं मदीं 740 पदां खातीर संद
पणजी: गोंय मनीसबळ विकास म्हामंडळा वतीन 23 एप्रील दिसा वेर्ण्यां रोजगार मेळाव्याचें आयोजन केलां. गोंयांतल्या तरणाट्यांक विवीध 25 कंपनीं मदल्या 740 रित्या पदां खातीर संद उपलब्ध करून दितले. मेळावो वेर्णें उद्देगीक वसणुकेंतल्या जीएसआयडीसी सभाघरांत सकाळीं 10 ते सांजवेळा 5 ह्या वेळांत आयोजीत करतले. मेळाव्या वरवीं पात्र गोंयकार तरणाट्यांक रोजगाराच्यो संदी उपलब्ध करून दितले.
मेळाव्याच्या आयोजनांत कामगार आनी रोजगार आयुक्त कचेरी (गोंय) आनी वेर्णें उद्देगीक संघटणा वांटेकार जातल्यो. गोंयचें 15 वर्सांचें वैध राबितो प्रमाणपत्र आनी गरजेची शिक्षणीक पात्रताय आशिल्ल्या उमेदवारांक ह्या मेळाव्यांत वांटो घेवंक मेळटलो.
उमेदवारांनी राबितो प्रमाणपत्र रोजगार मेळाव्याच्या दिसा वा प्रत्यक्ष नेमणुकेच्या वेळार सादर करप गरजेचें आसा. मेळाव्यांत आयटीआय, अभियांत्रिकी, फार्मासी, विज्ञान, वाणिज्य, वेवस्थापन आनी कला ह्या फाट्यां मदल्या उमेदवारां खातीर रोजगार संदी उपलब्ध आसतल्यो.
वट्ट 740 पदां पैकीं, आयटीआय खातीर (150 पदां) आनी अभियांत्रिकी पदविका (120 पदां) उपलब्ध आसतल्यो. फार्मासी फांट्यांतले पदवी आनी पदव्युत्तर धारकां खातीर दरेकी 100 पदां उपलब्ध आसात. ह्या मेळाव्यांत तंत्रज्ञ, अभियंते, कार्यकारी अधिकारी, विश्लेशक, वेवस्थापक आनी सहाय्यक कर्मचारी हांचे सारक्या विवीध प्रकराच्या भुमिकां खातीर नोकरेच्यो संधी उपलब्ध करून दितले.
इत्सूक उमेदवारांनी https://labour.goa.gov.in/jobfair/ ह्या संकेत थळा वरवीं आपली ऑनलायन नोंदणी करप गरजेची आसा. नोंदणी प्रक्रिया मेळाव्याच्या दिसा दनपारां 3 वरांचेर बंद जातली. येवपा-वचपाची सोय जावची म्हूण उमेदवारांक टायटन क्लॉक टॉवर (टायटन जंक्शन) सावन वेर्णें इंडस्ट्रियल इस्टेट हांगा जीआयडीसी हॉला मेरेन व्हरपा खातीर दोन कदंब बशींची वेवस्था करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
