जिवितांतली उर्जा

भांगरभूंय | प्रतिनिधी

फुडाराक केन्ना तरी येवपी सुखाची तयारी करपाक सगळें जिवीत वता. कितलीं मिण्टां, कितलीं वरां, कितले दीस  खुशाल जावन गेले? तोच खीण म्हळ्यार आमी जगलले  खरें जिवीत…!

कोणाकूच सगळो वेळ बरें वा वायट दिसूंक शकना. बरी वा वायट भावना ल्हारांनी येतात, ल्हार येवपाक आडावंक मेळना, तरंग निर्माण करपाकय मेळना. ल्हारां येतात आनी वतात तशे ढग येतात आनी वतात. त्योच भावना येतात आनी वतात. सगळ्या तरांचीं भावनां ल्हारांनी येतात आनी वतात. पूण आमी ताचेर इतलो व्हडलो बोवाळ करतात आनी तो आमच्या काळजाक दुखयता. हो भावनीक कोयर निरुपयोगी आनी अपरिपक्वतायेचें लक्षण.आसा . 

आमची  मानसीक भलायकी कित्याक इबाडटा हाचो विचार करात. चडशे फावट कोण तरी आमकां  कितें तरी मूर्खपण सांगतलो. तो मूर्खा भशेन कित्याक उलयलो ? कारण तांच्या काळजांत थोडो कोयर आशिल्लो आनी तांकां तो भायर उडोवपाचो आशिल्लो आनी आमी  तो धरपाक थंय आसतात आनी एकदां तो कोयर धरलो म्हणटकच तो खूब मोगान धरता आमी . जाग येवपाची खरी गरज आसा आमकां …  

भावनां कशीं हाताळची? एक व्हडलो प्रॉब्लेम आसा.आमी शारिरीक वाडत आसले तरी आमी चड करून भावनीक नदरेन वाडनात. भावनीक परिपक्वतायेचो उणाव म्हणल्यार सदांच आमच्या  भावनांचो हुस्को.. तो आमकां सरळ करपाक जाय… 

आमच्या जिवितांतली उर्जा व्हांवपाकय एक खाशेली दिका जाय. दिका दाखोवंक ना जाल्यार सगळेंच गडबड जाता. जिणेंत योग्य दिका मेळूंक नाशिल्ल्यान आयज चडशे लोक घुस्पागोंदळांत पडल्यात. जिणेंतली ल्हानशी गजाल आसूं वा व्हडली गजाल, फकत वचनबद्धतेक लागून ती मुखार वता. जितलें व्हडलें वचनबद्धताय तितलींच कामां सोपीं जातलीं. जितली ल्हान वचनबद्धताय तितलीच घुस्पागोंदळाची जाणविकाय जातली

जिणेक पळोवपाचे दोन मार्ग आसात. एक म्हणल्यार “कांय विशिश्ट ध्येय साध्य केल्या उपरांत हांव खुशाल जातलों.” आनी दुसरो म्हणल्यार “कितेंय जालें तरी हांव खुशाल आसा” अशें म्हणप. तुमकां कसलें जिवीत जगपाचें आसा? फुडाराक केन्ना तरी येवपी सुखाची तयारी करपाक सगळें जिवीत वता. कितलीं मिण्टां, कितलीं वरां, कितले दीस  खुशाल जावन गेले? तोच खीण म्हळ्यार आमी जगतले  खरें जिवीत…! 

गौरी भालचंद्र