भांगरभूंय | प्रतिनिधी
पणजी, प्रतिनिधी ः जिल्लो ग्रामीण उदरगत एजन्सीन राष्ट्रीय ग्रामीण उदरनिर्वाह अभियान (जीएसआरएलएम) ह्या प्रकल्पां खातीर 29 कंत्राटी पद्दतीच्यो नोकऱ्यो जाहीर केल्यात. जुलय 1 ते जुलय 11 मेरेन ह्या पदां खातीर मुलाखती जातल्यो. ह्या पदांचो प्रस्तावीत कालावधी कंत्राटी पद्दतीर फकत 2 वर्सा खातीर आसतलो, अशी म्हायती जीएसआरएलएमाचे अधिसुचोवणेत दिल्या.
जीएसआरएलएमचे प्रकल्प संचालक आनी सीईओ गोपाळ पार्सेकार हांणी रिती पदां भरपा खातीर कंत्राटी पदांची अधिसुचोवणी काडल्या. ब्लॉक प्रोग्राम वेवस्थापक ही 7 पदां, ब्लॉक वेवस्थापक आयबीसीबी 4, ब्लॉक वेवस्थापक उदरनिर्वाह 4, ब्लॉक वेवस्थापक अर्थीक समावेश 4, ब्लॉक वेवस्थापक एमआयएस 6 आनी लेखाकार, कार्यालयीन सहाय्यक, डाटा ऍन्टी ओपरेटर, एसव्हीईपी खाला ब्लॉक प्रक्लप वेवस्थापक हे खातीर दरेकी 1 अशीं पदां जाहीर केल्यात.
हे पदांचे पात्रतायेनुसार दर म्हयन्याचो पगार रु. 15 हजार ते रु. 35 हजार इतलो आसतलो. तशेच पात्रताये प्रमाण 12 वी ते समाजीक वावरांत पदव्युत्तर, समाजशास्त्र, ग्रामीण उदरगत, मनीस शास्त्र हांतूत पदविका, बी. एससी शेतकी, बी. एससी गोसवां सांबाळ, बी. बी. ए मार्केटींग, बी. कॉम आनी बी. ई हे शिक्षण गरजेचें आसा आनी इत्सुक उमेदवारां कडेन 2 ते 3 वर्साचो अणभव आसपाक जाय.
ह्यो नोकऱ्यो सुरवातीक पुराय कंत्राटी तत्वाचेंर दोन वर्सांच्या कालावधी खातीर आसतल्यो. थेट मुलाखतींचे आयोजन जातलें. गरजेची पात्रताय, अणभव आनी पिरायेचे निकश पुराय करपी उमेदवारांनी विहीत अर्जां सयत जल्म तारीख, योग्यताय आनी अणभव हाचे पुरावे दिवपी सहाय्य दस्तावेजां सयत जिल्लो ग्रामीण उदरगत एजन्सी स्पेसेस बिल्डिंग, 7 वो माळो, पाटो -पणजे हे सुवातेर थेट मुलाखती खातीर हजर रावचें, अशे अधिसुचोवणेत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
