भांगरभूंय | प्रतिनिधी
पणजी, प्रतिनिधी : हे लोकसभा वेंचणुकेंत गोंयकारांनी आपलो मोग रेव्होल्युशनरी गोवन्स पक्षाक उक्तावन मतदान केलां. मात आरजीपीक जिखोवपाचें काय तांकां कितल्या मतांची आघाडी दिवपाचें हें गोंयकारांनी थारायलां. भाजपा भशेन आमी आंकडे सांगून कसलोच तर्क वितर्क लायनात. ४ जूनाक निकाला दीस चित्र स्पश्ट जातलें अशें आरजीपीचे उत्तर गोंयचे उमेदवार आनी मुखेली मनोज परब हांणी सांगलें.
लोकसभा वेचणुकेंत व्हडा संख्येन मतदान केल्ले खातीर आरजीपीन बिरेस्तारा पत्रकार परिशदेंत गोंयकांरांचे उपकार मानले. मनोजा वांगडा दक्षीण गोंयचो उमेदवार रुबर्ट परेरा, सांतआंद्रेचे आमदार विरेश बोरकार आनी हेर फुडारी हजर आशिल्ले.
खंयच्या विचाराचेर भाजप उत्तरेक एक लाख आनी दक्षिणेंत ६० हजार मतांची आघाडी घेवपाचेर उलयता तें म्हाका खबर ना. इव्हीएम हीं सगळीं यंत्रणां तांचे कडेन आसात. ताच्या जिवार हो आंकडो मुख्यमंत्री सांगता आसूंये. हे वेंचणूकेक कितें जायत तें सांगपाक शकना अशें मतदान जालां. उत्तरेत श्रीपाद नायक हांचेर बेजार आशिल्ल्या भाजपाच्या समर्थकांनी भाजपाक अंदूं मत मारूंक ना. तांची मतां इंडी आघाडीक आयल्यांत काय आरजीपींक हें सांगू नजो, अशें मनोज हांणी सांगलें.
हेर पक्षां भशेन हे वेचणुकेंत आमी कसलीच तडजोड करूंक ना. वेचणूक लढोवपा खातीर खंयच्याच पक्षाकडल्यान, बिल्डर लोबीकडल्यान, कॅसीनों कडल्यान आमी पयशे घेवंक ना. फक्त गोंयकरांनी दिल्लो आपल्या घामा कश्टांचो दुडू डोनेशना वरवीं घेवन आमी वेचणूक लढल्यात. तडजोड करून वेचणुकेंतल्यान फाटीं सरपाक खूब ओफरी आयिल्ल्यो. मात आरजीपी फाटी सरपाक न्हय तर गोंयकारांचो आवाज संसदेंत पावोपा खातीर जल्माक आयल्या, अशें मनोज हांणी सांगलें.
गरमेचें ल्हार आसून लेगीत आरजीपीच्या वावुरप्यांनी घरा घरांनी वचून प्रचार केलो. असो प्रचार खयच्याच पक्षान करुंक नासतलो. सांत आंद्रे मतदारसंघांत आरजीपीचे मताधिक्य उणे करपा खातीर भाजप एक घरांत दोग जाणांक सरकारी नोकर्यांचे आश्वासन दितालो. आदलो आमदार फ्रान्सिस सिल्वेरा हांची काळ्या हारश्यांची गाडी पयशे वाटीत भोंवताली. जेन्ना आमी फ्लायींग स्क्वाॅडांक फोन मारलो. ते तांकां पयलीच म्हायती दिवन सादूर करताले, असो आरोप सांत आंद्रेचो आमदार विरेश बोरकार हांणी केलो.
भाजप आनी काँग्रेस पक्ष वेचणुंके खातीर काम करिनासले. ते फक्त आमकां बदनाम करपाचें काम करताले. जें काम आमच्या क्रांतिकारी वावुरप्यांनी केलां तांकां हांव सलाम करतां. आमकां सकारात्मक निकाल मेळटलो आनी हे फावट गोंयचो आवाज संसदेंत पावतलो, अशें आरजीपीचे दक्षीण गोंयचे उमेदवार रुबर्ट हांणी सांगलें.
भाजप काँग्रेसीचे फकत धर्माचें राजकारणः मनोज
भाजपान ‘हिंदू खतरे में है’ आनी काँग्रेसीन ‘क्रिस्तांव खतरे में है’ असलेच धर्माचेर राजकारण केले. मात प्रत्यक्षांत गोंयकारांचे ंअस्तित्व धोक्यांत आसा. गोंयकारांच्या मुद्याचेर केन्नाच तांणी आवाज काडूंक ना. जर गोंयकार हांच्या राजकारणाक बळी पडले जाल्यार एक दिसा गोंयांत हिंदू आनी क्रिस्तांव लोकां मदीं गेर्र जातलें, असो आरोप आरजीपीचे मुखेली मनोज परब हांणी केलो. आमी हारपाक जमा जाल्यात अशे तांकां जेन्ना कळटा तेन्ना धर्माचें राजकारण हे दोनय पक्ष करतात. तुमी लोकशाय वाचयात धर्म वाटोवपाक देव आसा. आमी जेन्ना पोगो बील तयार केलें तेन्ना कसल्याच धर्माचो आस्पाव करूंक ना. सगळ्या गोंयकरांचो आस्पाव तातूंत आसा, अशे मनोज हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
