भांगरभूंय | प्रतिनिधी
तिचें एकूय बँक खातें ना, गाडयोय नांवार नात
पणजी : रेल्वेंत आनी हेर सरकारी खात्यांनी नोकरी दिता अशें सांगून लोकांक तोपी घालपी ‘जाॅब एजंट’ प्रिया अजय यादव आनी रोहन राजेंद वेंजी हांची चवकशी दिवचल पुलिसांनी सुरू केल्या. तांचे कडल्यान ११६ ग्राम भांगराच्यो वस्ती आनी तीन गाडयो जप्त केल्यात.
२२ आॅगस्टाक लक्ष्मी अशोक दलवाई (साईनाथ अपार्टमेंट, दिवचल, मूळ बेळगांव) हांणी कागाळ केल्ली. वयल्या दोगांनी आपणाक नोकरेचें हांयस दाखोवन २० लाख ७० हजार रुपयांची अर्थीक फटवणूक केली, अशें तिणें कागाळेंत म्हणलां.
तपासांत, प्रिया यादवान भांगर घाणाक दवरून रीण घेतलां अशें दिसून आयलां. ११६ ग्राम भांगराचें ९ लाख रुपया मोल जाता. पुलिसांच्या मतान, तिणें दिवचलकारांक तशेंच हेर शारांतल्या लोकांक सरकारी नोकरी दितां म्हूण सांगून १ कोटी रुपयां परस चड पयशे घेतल्यात. प्रियाचें स्वताचें एकूय बँक खातें ना. तशेंच एकूय गाडी तिच्या नांवार ना, अशें तपासांत दिसलें.
कागाळ नोंद जाल्ली तेन्नाच्यान प्रिया गायब आसली. पुलिसांनी दिनेश गडेकार, विकेश हडफडकार, विशाल परब आनी स्मिता पोपकार हांचो पंगड महाराष्ट्रांत धाडिल्लो. तंत्रज्ञानाचे मजतीन तांणी सोद घेतलो आनी प्रिया फुलेवाडी- कोल्हापूर सांपडली. थंय ती दोन म्हयने लिपून बशिल्ली. तिका दिवचले हाडून अटक केली. वयल्या पुलीस पंगडान एसडीपीओ जिवबा दळवी आनी एसपी अक्षत कौशल्य हांच्या मार्गदर्शना खाला तपास केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
